აზერბაიჯანის სახელმწიფო ნავთობკომპანია „სოკარის“ პრეზიდენტი ქვემო ქართლში მედიისათვის გასაიდუმლოებული ვიზიტით ჩავიდა. მარნეულის ჩაის სახლში როვნაგ აბდულაევი, პარტია „ქართული ოცნების“ მაჟორიტარებთან და ადგილობრივი ხელისუფლების წარმომადგენლებთან ერთად, მუნიციპალიტეტის უხუცესებს და საჯარო მოხელეებს შეხვდა.

აზერბაიჯანის მთავრობის გავლენიანი მაღალჩინოსანი  თქმით, ის საპრეზიდენტო არჩევნების წინ საქართველოში მმართველი პარტიის დასახმარებლად არ ჩამოსულა და ვიზიტის მიზანი მხოლოდ ეთნიკურ აზერბაიჯანელებთან შეხვედრა იყო.

„ჩვენ პოლიტიკაში არ ვერევით აქ ვართ ეთნიკურად აზერბაიჯანელების პრობლემების გასაცნობად. გვინდა ვიცოდეთ, როგორ აგვარებს საქართველოს ხელისუფლება მათ პრობლემებს. ჩვენ ვთანამშრომლობთ ხელისუფლებასთან და არა ოპოზიციასთან ეს არის აზერბაიჯანის ხელისუფლების პოლიტიკა“, განაცხადა როვნაგ აბდულაევმა „რუსთავი 2“-ის ჟურნალისტთან საუბრისას.

აზერბაიჯანის სახელმწიფო ნავთობკომპანიის პრეზიდენტს მარნეულში ახალგაზრდები აქციით დახვდნენ.

მათი მტკიცებით, აზერბაიჯანის მთავრობის მაღალჩინოსანი რეგიონში წინასაარჩევნოდ ქართული ოცნების დასახმარებლად ჩამოვიდა და ჩაის სახლში შეკრებილებს ღიად მოუწოდა, ხმა „ქართული ოცნების“ კანდიდატისთვის მიეცათ.

წინასწარ დაგეგმილ შეხვედრას რიგითი მოქალაქეები არ დაასწრეს, ვინც შენობაში არ შეუშვეს, აბდულაევს შეძახილებით შეხვდნენ.

ქართული ოცნების მაჟორიტარი დეპუტატი, თამაზ ნავერიანი, რომელიც აბდულაევს პირადად მასპინძლობდა, ამტკიცებს, რომ სოკარის პრეზიდენტის ვიზიტი არჩევნებს არ უკავშირდება და ის არჩევნების წინ ბაქოდან მარნეულში პროექტებზე სალაპარაკოდ ჩამოვიდა.