„ევროპული საქართველოს" პრეზიდენტობის კანდიდატი დავით ბაქრაძე „ქართული ოცნების" თავმჯდომარის, ბიძინა ივანიშვილის ინტერვიუს ეხმაურება.

როგორც საგანგებო ბრიფინგზე დავით ბაქრაძემ განაცხადა, გუშინდელმა ინტერვიუმ კიდევ ერთხელ დაადასტურა, რომ მოსახლეობამ საპრეზიდენტო არჩევნებზე მხარი სალომე ზურაბიშვილს არ უნდა დაუჭიროს.

„ივანიშვილის გუშინდელი განცხადებები გახლდათ საუკეთესო პასუხი, რატომ უნდა მივიდეთ არჩევნებზე და რატომ არ უნდამივცეთ ხმა „ქართულ ოცნებას“ და „ქართული ოცნების“ კანდიდატის. გუშინ მოვისმინეთ „ქართული ოცნების“ და სახელმწიფო მმართველის ხედვა, რომ თურმე ქვეყანაში მიმდინარეობს აღმშენებლობის პროცესი და უბრალოდ ადამიანები ვერ ხვდებიან, იმიტომ, რომ ჟურნალისტები ეუბნებიან, რომ ყველაფერი არის ცუდად. თურმე, ერთი დღე ტელევიზორი რომ გამოვრთოთ და გარეთ გამოვიხედოთ, დოლარი 2 ლარზე ნაკლები გახდება, გავიგონებთ „ქართული ოცნების“ გახსნილ, აგუგუნებული ქარხნების ხმას. ეს ყველაფერი იქნებოდა სასაცილო, რომ არ იყოს ტრაგიკული, რადგან ასეულობით ათასი ოჯახის ბედს ეხება", განაცხადა დავით ბაქრაძემ საგანგებო ბრიფინგზე.