ბიძინა ივანიშვილის ტელეინტერვიუს შეფასებისას „ეროვნულ-დემოკრატიული პარტიის“ თავმჯდომარემ და „ერთიანი ნაციონალური მოძრაობის“ საპრეზიდენტო კანდიდატის, გრიგოლ ვაშაძის აქტიურმა მხარდამჭერმა, ბაჩუკი ქარდავამ „რუსთავი 2“-თან საუბრისას თქვა, რომ ივანიშვილის ინტერვიუ „მუქარის შემცველი“ იყო, თუმცა ქარდავას ეჭვი ეპარება, რომ „ბიძინა ივანიშვილს უკვე რაიმე მუქარის განხორციელების ძალა და რესურსი გააჩნია“.

„[ივანიშვილის ტელეინტერვიუ] იყო მუქარის შემცველი, მაგრამ მე ეჭვი მეპარება, რომ ბიძინა ივანიშვილს უკვე რაიმე მუქარის განხორციელების ძალა და რესურსი გააჩნია. ეს მას გუშინ სახეზე ეწერა. მან უბრალოდ ნიღაბი ჩამოიხსნა და გაშიშვლებულია. მან ქართველ ხალხს დაანახა თავისი რეალური სახე, რომ უნიათოსთან ერთად არის სახიფათოც ჩვენი ქვეყნის მომავლისთვის. აღმოჩნდა, რომ სიღატაკე, ის რომ მარიხუანის რეალიზაცია უნდა დავიწყოთ, აი, ყველა უბედურება, რაც კი საქართველოში არის და ქართველი ხალხი ამაზე საუბრობს, ამის ინიციატორი ყოფილა თვითონ, მაგრამ ეს ყველაფერი თურმე ყოფილა „რუსთავი 2“-ის ბრალი. ეს უბრალოდ სასაცილოა. გამოვრთე ამ დილით რუსთავი 2, მაგრამ არაფერი არ შეცვლილა, ისევ უბედრურებაა საქართველოში“, განაცხადა ბაჩუკი ქარდავამ.