მსოფლიო ბანი, ფონდ „იავნანას" დაფუძნებელი პაატა ბურჭულაძე „ქართული ოცნება - დემოკრატიული საქართველოს" თავმჯდომარის, ბიძინა ივანიშვილის სამი ტელეკომპანიის ჟურნალისტებთან ინტერვიუს დროს მისი მისამართით გაკეთებულ განცხადებას ეხმაურება.

ბურჭულაძე ამბობს, რომ ივანიშვილის ყველა განცხადება სიცრუეა. მსოფლიო ბანი აცხადებს, რომ ბიძინა ივანიშვილთან შეხვედრა ნამდვილად შედგა, თუმცა, ეს არა პოლიტიკურ საკითხს, არამედ, პარიზში დაგეგმილ საქველმოქმედო კონცერტს შეეხებოდა. მისივე განმარტებით, პარტიის ამჟამინდელ თავმჯდომარეს თავად ჰქონდა შეთავაზება ბურჭულაძისადმი, რაც გულისხმობდა იმას, რომ მსოფლიო ბანი თავდაპირველად „ქართული ოცნების" მხარდამჭერი, მოგვიანებით კი, პრეზიდენტი გამხდარიყო. 

„ყველა სიტყვა თავიდან ბოლომდე იყო სიცრუე. რომ მე მივედი მასთან პოლიტიკურ საქმეზე სასაუბროდ, ეს იყო სიცრუე. რომ მერე მე და ჩემი მეუღლე მივედით ერთად, ეს იყო სიცრუე - ჩვენ მასთან, ერთად არ მივსულვართ არასდროს. მერე რომ ჩემი მეუღლე მივიდა და მოსთხოვა მას თურმე თანხა, ეს იყო სიცრუე. უნდა ჩამოყალიბდეს, იმ დროს იძახდა 50 მილიონს, მერე რატომღაც დამაქვეითა ძალიან და 10 მილიონი, ახლა 2 მილიონზე ჩამოვიდა. ფაქტი ერთია - მან აღიარა, რომ მე მისგან თანხა არ მიმიღია. ეს არის ყველაზე მთავარი. ამიტომაც, მე ვარ თავისუფალი. მე მგონია, რომ ბიძინა ივანიშვილი არის დამღუპველი ჩვენი ქვეყნისთვის. ის სრუობს ახლა, მაგრამ მას შეუძლია ძალიან დიდი ტრავმა მოგვაყენოს მთელ ქვეყანას, თუ ღმერთმა არა ქნას, თუ სალომე ზურაბიშვილი გაყალბების გზით მაინც გაიყვანა. ეს იქნება ნამდვილად დაღუპული საქართველო. მისი მიზანია, რომ ყველა ადამიანი იყოს მასზე დამოკიდებული და ვინც არ არის, არის მისი მტერი.... მაგაზე იყო შემოთავაზება, რომ პრეზიდენტი გავმხდარიყავი მე, პრემიერ მინისტრი ყოფილიყო ეგ.... თანხაზე იყო საუბარი, ნუ მათქმევინებთ, თვითონ დაასახელა თანხა და მართლა ეგ თანხა იყო - 10 მილიონი, ვხუმრობდით.... ორჯერ შევხვდით და რასთან დაკავშირებით არ გაინტერესებთ? პარიზის კონცერტთან დაკავშირებით", უთხრა „რუსთავი 2"-ს პაატა ბურჭულაძე

ბიძინა ივანიშვილის თქმით, ბურჭულაძემ პოლიტიკაში შემოსვლის სანაცვლოდ 9 მილიონი დოლარი მოითხოვა.