„ევროპული საქართველოს“ პრეზიდენტობის კანდიდატმა, დავით ბაქრაძემ საზოგადოებრივი მაუწყებლის ეთერში, გადაცემაში „დებატები 2018“ გადაცემის წამყვანის კითხვის  – „რა არის თქვენი მთავარი იდეა“ პასუხად განაცხადა, რომ საქართველოს სჭირდება წინსვლა და განვითარება, „ქართულმა ოცნებამ“ კი, ქვეყანას განვითარება ვერ მოუტანა.

ბაქრაძის თქმით, ხელისუფლება დღემდე წარსულთან ბრძოლითა და  თავის მართლებით  არის დაკავებული.მისივე თქმით, საქართველო დღეს არის ცუდად და შველა სჭირდება.

„ევროპული საქართველოს“ პრეზიდენტობის კანდიდატი მიიჩნევს, რომ  შველა მდგომარეობს ხელისუფლების შეცვლასა და ქვეყნის წინ წაყვანაში.

„ჩვენი მთავარი იდეა არის ის, რომ საქართველოს სჭირდება წინსვლა, საქართველოს სჭირდება განვითარება. „ქართულმა ოცნებამ“ ქვეყანას ვერ მოუტანა განვითარება. ხელისუფლება დღემდე დაკავებულია წარსულთან ბრძოლით, ხელისუფლება დღემდე დაკავებულია თავის მართლებითა  და დღემდე დაკავებულია იმის მტკიცებით, რომ ქვეყანაში ყველაფერი არის კარგად და ხალხი ვერ იგებს.

ქალბატონმა სალომემ ბრძანა, არც ისე ცუდად არის საქართველოო. ცუდად არის ქალბატონო სალომე საქართველო და თქვენ რომ ხალხში დადიოდეთ, თქვენ რომ ხალხს ეკონტაქტებოდეთ, ნახავთ, რომ საქართველო არის ცუდად და ცუდად ყოფნას სჭირდება შველა.

შველა არის დღევანდელი ხელისუფლების შეცვლა. შველა არის საპრეზიდენტო  არჩევნებზე მოსვლა და განსხვავებული არჩევანის გაკეთება. შველა არის ქვეყნის წაყვანა წინ მომავლისკენ, ყოველგვარი დაპირისპირებისა და შურისძიების გარეშე.

გვჭირდება პრეზიდენტი, რომელიც იქნება თითოეული ადამიანის, თითოეული მოქალაქის პრეზიდენტი საქართველოში. ვისაც ეცოდინება მათი გაჭირვება, ვისაც ეცოდინება მათი პრობლემა და ვინც თავის თავს ჩათვლით ვალდებულად, დაეხმაროს თითოეულ ადამიანს ამ ქვეყანაში.

აი ეს არის წინსვლა, ქვეყანას სწორედ წინსვლა სჭირდება, სწორედ ხალხის პრეზიდენტი სჭირდება და არა კაბინეტში გამოკეტილი ადამიანი, რომელიც საკუთარ თავს ხედავს ხალხზე ზემოთ. ეს არის ის მთავარი დაპირება, რომლითაც ჩენ მოვდივართ – ცვლილება, უკეთესობა, მშვიდობიანი განვითარება, რადგან დღეს საქართველოს უჭირს, დღეს ქვეყანა არის კრიზისში და ის, რომ ქვეყანა არც ისე ცუდად არის, მიმაჩნია, რომ კიდევ ერთხელ ადასტურებს, რომ ვერც „ქართული ოცნება“, თუნდაც გუშინ მისი თავმჯდომარის ბიძინა ივანიშვილის სახით, რომელიც გვიმტკიცებდა, რომ აღმშენებლობა მიდის და ვერც მისი კანდიდატი ქალბატონი ზურაბიშვილი ვერ ხედავენ და ვერ აფასებენ  პრობლემებს, რომელიც დღეს ქვეყანაშია“, განაცხადა ბაქრაძემ.