მოკლული ჟურნალისტის, ჯამალ ხაშოგის უფროსი ვაჟი, სალაჰი (ფოტოზე ხელმარცხნივ, საუდის ტახტის მემკვიდრესთან შეხვედრისას) ოჯახის წევრებთან ერთად საუდის არაბეთიდან ამერიკის შეერთებულ შტატებში ჩავიდა.

სალაჰ ხაშოგის მანამდე აკრძალული ჰქონდა საუდის არაბეთის დატოვება და არ შეეძლო ჩასულიყო შეერთებულ შტატებში თვითდაკისრებულ დევნილობაში მყოფ მამასთან, რომელიც საუდის ხელისუფლების მკვეთრი კრიტიკით გამოირჩეოდა.

გამომძიებლებმა დაადასტურეს, რომ ჯამალ ხაშოგი სტამბულში, სამი კვრის წინათ საუდის არაბეთის საკონსულოში იქნა მოკლული.

საუდის არაბეთის პროკურორი კვირას, გამოძიების ფარგლებში, თურქეთში ჩავა, როგორც ეს ქვეყნის პრეზიდენტმა რეჯეფ თაიფ ერდოღანმა სატელევიზიო გამოსვლისას განაცხადა და დაამატა, რომ საუდელი პროკურორი სტამბულის პროკურატურის ხელმძღვანელ პირებს შეხვდება.

BBC-ის ცნობით, ერდოღანმა აღნიშნა, რომ თურქეთს გააჩნია სხვა ისეთი სამხილები, რომელიც ჯერჯერობით არ გამჟღავნებულა.

მან ასევე მოუწოდა ოფიციალურ ერ-რიადს გაამჟღავნოს ჯამალ ხაშოგის ცხედრის ადგილმდებარეობა და ამასთან, დაასახელოს ადგილობრივი პირი, რომელიც მის გაუჩინარებაში იყო ჩართული.

რამდენიმე დღის წინ საუდის არაბეთის საგარეო საქმეთა მინისტრმა, ადელ ალ-ჯუბეირმა „ფოქს ნიუსს“ განუცხადა, რომ ჟურნალისტ ჯამალ ხაშოგის „მკვლელობა“ „უზარმაზარი შეცდომაა“ და უარყო გავრცელებული ცნობები იმის შესახებ, რომ ტახტის მემკვიდრემ, გავლენიანმა პრინცმა გასცა მისი მკვლელობის ბრძანება.

ჟურნალისტი ბოლოს სტამბულში საუდის არაბეთის საკონსულოში შესვლისას ნახეს.

საუდის არაბეთმა თავდაპირველად გამოაცხადა, რომ ჟურნალისტმა 2 ოქტომბერს უვნებელმა დატოვა შენობა, მაგრამ მოგვიანებით, 19 ოქტომბერს, პირველად აღიარა, რომ იგი მკვდარი იყო - განაცხადა რა, რომ ის ჩხუბის დროს მოკლეს. ოფიციალური ერ-რიადის ამ მტკიცებამ კი ფართო სკეპტიციზმი წარმოშვა.

თურქეთის ოფიციალური პირები დარწმუნებული არიან, რომ ხაშოგი, საუდის არაბეთს მთავრობის ცნობილი კრიტიკოსი, საუდის აგენტების ჯგუფის მიერ იქნა მოკლული შენობის შიგნით და ანკარა ამტკიცებს, რომ მათ ამის დამადასტურებელი სამხილები გააჩნიათ.

როგორ შეცვალა საუდის არაბეთმა პოზიციები

ადელ ალ-ჯუბეირის კომენტარები, რომელიც ინციდენტს აღწერს, როგორც მკვლელობას, ყველაზე მკაფიო განცხადებაა რაც კი ხაშოგის მკვლელობასთან დაკავშირებით საუდის ოფიციალური პირების მხრიდან გაკეთებულა.

„ჩვენი ურყევი ნებაა გამოვიკვლიოთ ყველა ფაქტი და დავსაჯოთ ისინი, ვინც პასუხისმგებელია ამ მკვლელობაზე“, განაცხადა მინისტრმა და დაამატა:

„ნათელია, რომ დაშვებულია უდიდესი შეცდომა და რამაც კიდევ უფრო გააუარესა ეს შეცდომა, იყო იმის მცდელობა, რომ დაეფარათ ის“.

მან ასევე თქვა, რომ მათ არ იციან სად არის ცხედარი. საგარეო მინისტრი დაჟინებით ირწმუნება, რომ ქმედება არ ყოფილა ნაბრძანები ტახტის მემკვიდრე მუჰამედ ბინ სალმანის მიერ.

„ჩვენი სადაზვერვო სამსახურების მთავარმა ხელმძღვანელობამაც კი არაფერი არ იცოდა ამის შესახებ“, განაცხადა მინისტრმა და მომხდარს „არანორმალური ოპერაცია“ უწოდა.

საგარეო საქმეთა მინისტრის ამ განცხადებებს წინ უძღოდა პარასკევს, 19 ოქტომბერს საუდის არაბეთის აღიარება, რომ ხაშოგი მკვდარი იყო. პროკურატურის მიერ გავრცელებულ განცხადებაში ნათქვამია, რომ ჟურნალისტი მოკლული იქნა იმ დროს, როდესაც ჩხუბი მასსა და იმ რამდენიმე ადამიანს შორის წარმოიშვა, რომელთაც ხაშოგი საკონსულოს შენობის შიგნით ხვდებოდა.

ამ აღიარებამდე - 18 დღის განმავლობაში - საუდის არაბეთის ხელისუფლება ამტკიცებდა, რომ მათი დაუძინებელი კრიტიკოსი, ჯამალ ხაშოგი ბოლოს ცოცხალი, შენობის დატოვების დროს ნახეს.

ამის შემდეგ მათ თქვეს, რომ დააპატიმრეს 18 ადამიანი, პოსტებიდან გაათავისუფლეს მუჰამედ ბინ სალმანის ორი თანაშემწე და ტახტის მემკვიდრის ხელმძღვანელობით ჩამოაყალიბეს ორგანო, რათა მოახდინონ სადაზვერვო სააგენტოს რეფორმირება.

ორთავემ, მეფე სალმანმა და მისმა ვაჟმა, ტახტის მემკვიდრემ კვირას ხაშოგის ვაჟ სალაჰს მამის გარდაცვალების გამო სამძიმარი გამოუცხადეს, როგორც ამას BBC საუდის მედიაზე დაყრდნობით იტყობინება.

მოკლული ჟურნალისტის ვაჟი სალაჰ ხაშოგი საუდის არაბეთში ცხოვრობს და „უოლ სთრით ჯორნალის“ თანახმად, აკრძალული ჰქონდა ქვეყნის დატოვება და მამამისთან შეერთებულ შტატებში სტუმრობა, სადაც იგი თვითდაკისრებულ დევნილობაში ცხოვრობდა.