„ედისონ რისერჩის“ კვლევის შედეგებს, ალოკაციით და ალოკაციის გარეშე, რომლის მიხედვითაც, პრეზიდენტობის კანდიდატებს შორის გაერთიანებული ოპოზიციის კანდიდატი გრიგოლ ვაშაძე ლიდერობს, დღეს გამართულ საგანგებო ბრიფინგზე თბილისის მერი, „ქართული ოცნება - დემოკრატიული საქართველოს" გენერალური მდივანი კახა კალაძე გამოეხმაურა.

კალაძე აცხადებს, რომ სოციოლოგიური კვლევის შედეგი რეალობას სრულად არის აცდენილი.

„გუშინ „ნაციონალურმა მოძრაობამ“ საკუთარი პარტიული ტელევიზიის ეთერით გამოაქვეყნა გაყალბებული კვლევის შედეგები, რომელიც სრულად არის აცდენილი პოლიტიკურ სინამდვილეს. „ნაციონალური მოძრაობა“, რომელიც 2012 წლის შემდეგ ვეღარ აყალბებს არჩევნებს, აყალბებს იმას, რაც შეუძლია - სოციოლოგიურ კვლევებს. რეალობა კი არის ის, რომ ნამდვილი, გაუყალბებელი სოციოლოგიური კვლევის თანახმად, წინასწარი მონაცემებით, სალომე ზურაბიშვილი პირველივე ტურში იგებს არჩევნებს.

ნიშანდობლივია, რომ ჩვენი დაკვეთით ჩატარებული სოციოლოგიური კვლევის შედეგების გამოქვეყნების შეეშინდა „რუსთავი 2“-ს. ეს არის მორიგი შემთხვევა, როდესაც „ნაციონალური მოძრაობა“ და მისი პარტიული ტელევიზია ჩაკეტილი არიან საკუთარ სიყალბეში და გაურბიან მათთვის არასასურველ სიმართლეს. თუმცა, ისინი ვერ გაექცევიან სიმართლეს, როდესაც ოფიციალურად გამოცხადდება არჩევნების შედეგები და როდესაც ქართველი ხალხის ნებით, პრეზიდენტად გამოცხადდება სალომე ზურაბიშვილი", განაცხადა კალაძემ ბრიფინგზე.

სოციოლოგიური კვლევის შედეგები გამოაქვეყნა გუშინ, 25 ოქტომბერს თავად მმართველმა პარტიამაც.