„ძალა ერთობაშია“-ს საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელმა, გიორგი ვაშაძემ ახლახან გამართულ ბრიფინგზე განაცხადა, რომ „ქართულმა ოცნებამ“ ამომრჩევლების მოსყიდვა დაიწყო.

„საგანგაშოა, რომ ქობულეთის 32-ე უბანზე 2 ხუთი ნომერია ბიულეტენში, ანუ მეორე 51 თუ რაღაც უნდა ყოფილიყო და ერთიანი აკლია ბიულეტენში. დაფიქსირებულია ავტომანქანებიდან პირდაპირ ამომრჩევლის მოსყიდვის ფაქტები საარჩევნო უბნებზე - თანხებს როგორ არიგებს „ქართული ოცნების“ აქტივისტები. მასობრივად, საარჩევნო უბნებზე შესასვლელში არის გამოკრული დარღვევით „ქართული ოცნების“ პლაკატები, რაც არის ასევე დარღვევა და ჩვენ საჩივრები გვაქვს შეტანილი შესაბამისი და ვითხოვთ კომისიებისგან, რომ გასუფთავდეს საარჩევნო უბნები, რომ არ მოხდეს ამომრჩეველზე ზეწოლა“, განაცხადა გიორგი ვაშაძემ, რომელმაც ასევე ისაუბრა მარნეულის 58-ე უბანზე მომხდარ დარღვევაზე და აღნიშნა, რომ ერთ-ერთი დეპუტატი გაერთიანებული ოპოზიციის წარმომადგენელს ფიზიკურად გაუსწორდა.

გარდა ამისა, ვაშაძემ განაცხადა, რომ გლდანში 82-ე და 83-ე უბანზე ავტომობილიდან მოქალაქეებს ფულს ურიგებენ. მისივე თქმით, ახალქალაქში რამდენიმე უბანი დაგვიანებით გაიხსნა.

„ვაფრთხილებთ „ქართულ ოცნებას“, რომ შეეშვით ამომრჩევლის მოსყიდვას. ეს არის სისხლის სამართლის დანაშაული“, განაცხადა გიორგი ვაშაძემ.