„ჩვენს ხელთ არსებული ყველა შესაძლო წინასწარი მონაცემებით, უპირობოდ მარცხდება სახელისუფლებო კანდიდატი სალომე ზურაბიშვილი და იმარჯვებს ამ არჩევნებში, ამ ისტორიულ არჩევნებში, გაერთიანებული ოპოზიციური კანდიდატი, ბატონი გრიგოლ ვაშაძე“, განაცხადა რამდენიმე წუთის წინ „ერთიანი ნაციონალური მოძრაობის“ ერთ-ერთმა ლიდერმა, ნიკა მელიამ.

„რაც კი ჩვენ ქვეყანაში, საქართველოს ისტორიაში ტარდება არჩევნები, შევარდნაძის პერიოდის ჩათვლით, ამ მასშტაბის გაყალბები, ამ მასშტაბის მანიპულაციები საარჩევნო უბნებზე, არ ყოფილა არასოდეს გამომჟღავნებული მტკიცებულებების სახით - ვიდეო, აუდიო და ფოტო მტკიცებულებების სახით“, აღნიშნა მელიამ და დაამატა, რომ „ქართული ოცნება“ მთელი ადმინისტრაციული რესურსითაა ჩართული არჩევნების გასაყალბებლად. მან თქვა, რომ ადგილი აქვს კარუსელს, ფულის დარიგებას, საჯარო მოხელეების საარჩევნო უბნებზე ძალდატანებით მიყვანას.

„ამ ყველაფრისდა მიუხედავად, მარცხდება, მარცხდება დიახაც, სახელისუფლებო კანდიდატი. ხელისუფლებამ ამოწურა ძალდატანებით უბნებზე მისაყვანი ხალხის რესურსი. ახლა დარჩა მთავარი: 5 საათიდან 8 საათამდე უნდა დავიცვათ თითოეული ქართველის ხმები მთელი საქართველოს მასშტაბით და ჩვენ გადავდივართ საგანგებო მდგომარეობაზე, გადავდივართ ყველანი ხმების დასაცავად ყველა უბანზე და მოვუწოდებ ხელისუფლებას, ნუ აიძულებთ თქვენს დაქვემდებარებაში მყოფ მაღალჩინოსნებს, ჩაიდინონ სისხლის სამართლებრივი დანაშაული, რომელზეც აუცილებლად მოუწევთ მათ პასუხისგება“, განაცხადა მელიამ.