საზღვარგარეთ საარჩევნო პროცესის დროს დაფიქსირებულ დარღვევებთან დაკავშირებით „ევროპული საქართველო“ პასუხისმგებლობას ცესკო-სთან ერთად საგარეო უწყებას და იუსტიციის სამინიტროს აკისრებს.

ამის შესახებ განცხადება, გიგი უგულავამ ჟურნალისტებთან შეხვედრის დროს გააკეთა. მან განმარტა, რომ ემიგრანტების დიდი ნაწილი ხმის მიცემის პროცედურაში ვერ მონაწილეობს, რადგან ზოგიერთი მათგანი საარჩევნო სიაში არ არის დაფიქსირებული.

„ცესკო ვერ მოიხსნის ამაზე პასუხისმგებლობას, თუმცა პირველადი დანაშაული და როგორც ჩანს, ეს არის შეგნებულად გაკეთებული, ეს არის იუსტიციის სამინისტროს და საგარეო საქმეთა სამინისტროს საკონსულო დეპარტამენტის მიერ ორგანიზებული გაყალბება. ჩვენ ვითხოვთ პასუხს, საკონსულო დეპარტამენტისა და იუსტიციის სამინისტროსგან, ისევე როგორც ცესკო-სგან იმიტომ, რომ საბოლოო ჯამში, მათი პასუხისმგებლობაა ეს ყველაფერი, როდესაც ადამიანები არ ხვდებიან სიაში და ეს არ არის შემთხვევები იმიტომ, რომ უცხოეთის უბნების მიმართ, ცუდი გაგებით, სიფრთხილე გამოიჩინეს, როგორც ჩანს და მასიურად ადამიანები უბრალოდ ადგნენ და მოტეხეს საარჩევნო პროცესიდან“, განაცხადა გიგი უგულავამ.