საქართველოში ჩატარებულ საპრეზიდენტო არჩევნებს „ქართული ოცნების" ყოფილი მრჩეველი, კოლუბიის უნივერსიტეტის პროფესორი ლინკოლნ მიტჩელი ეხმაურება და აცხადებს, რომ არჩევნების უკეთესად ჩატარებაც შეიძლებოდა.

როგორც მიტჩელი ამბობს, მეორე ტურში თუ სალომე ზურაბიშვილი გაიმარჯვებს, „ქვეყანაში სიტუაცია ისევ ისე გაგრძელდება, როგორც აქამდე იყო", ხოლო გრიგოლ ვაშაძის გამარჯვება ერთპარტიულ მმართველობას დაასრულებს.

„საპრეზიდენტო არჩევნებზე ერთი შეხედვით მნიშვნელოვანი დარღვევები არ ყოფილა, თუმცა უკეთესად ჩატარებაც შეიძლებოდა. ვფიქრობ, რომ მაინც და მაინც კარგი დღე არ არის „ქართული ოცნებისთვის". დავუშვათ, თუ სალომე ზურაბიშვილმა გაიმარჯვა, ქვეყანაში სიტუაცია ისევ ისე გაგრძელდება, როგორც აქამდე იყო, მაგრამ თუ გრიგოლ ვაშაძე გაიმარჯვებს, ეს გარკვეულწილად, კარგი იქნება, რადგან ეს იქნება პირველი ნაბიჯი ქვეყანაში ერთპარტიული მმართველობის დასრულებისკენ", განაცხადა მიტჩელმა და მმართველი პოლიტიკური გუნდის მიერ დაშვებულ სამ ძირითად შეცდომაზე გაამახვილა ყურადღება.

„პარლამენტის თავმჯდომარე ამბობდა, რომ მათ დიდი მხარდაჭერა ჰქონდათ, თუმცა რეალურად ასე არ არის. გეტყვით სამ მიზეზს თუ რა შეცდომები დაუშვა „ქართულმა ოცნებამ." პირველი, სალომე ზურაბიშვილი არ იყო ძლიერი კანდიდატი, მეორე ხელისუფლებას ხალხთან კომუნიკაციის პრობლემა აქვს, ისინი ვერ გადმოსცემენ რეალურად რა ხდება ქვეყანაში, მესამე „ქართული ოცნება" მუდმივად „ნაციონალური მოძრაობის" დღის წესრიგს მიჰყვება", აღნიშნა მიტჩელმა.