საგამოფენო ცენტრ “ექსპო-ჯორჯიაში” პროგრამა – “აწარმოე საქართველოში” ერთი წლის შემაჯამებელ ღონისძიებაზე სიტყვით გამოსვლისას პრემიერ-მინისტრმა ირაკლი ღარიბაშვილმა მოკლედ მიმოიხილა, საიდან დაიწყო მეწარმეობის განვითარების ხელშეწყობა საქართველოში და განაცხადა, რომ სადღეისოდ, 130-ზე მეტი საწარმოა დაფინანსებული და 600-ზე მეტი საწარმოა გადაირაღებული.


“როდესაც ჩვენ მოვედით ხელისუფლებაში, მაშინ ბიძინა ივანიშვილის ინიციატივით დავიწყეთ აქტიურად მეწარმეობის განვითარება. ჩვენ ძალიან კარგად ვიცით და ეს არაერთ ანგარიშში არის ასახული, მათ შორის მსოფლიო ბანკის და სხვა, რომ ჩვენი ეკონომიკის მთავარი გამოწვევა არის უმუშევრობა, ადგილობრივი წარმოების განვითარება, სოფლის მეურნეობის განვითარება და სწორედ ამიტომ ჩვენ დავიწყეთ პირველ წელს იაფი აგროკრედიტის განვითარება. 130-ზე მეტი საწარმოა დღეისთვის დაფინანსებული და 600-ზე მეტი საწარმოა გადაიარაღებული. ჯამში ჩვენ 900 მილიონი ლარის ინვესტიცია განვახორციელეთ ბოლო 2 წლის განმავლობაში სოფლის მეურნეობის სექტორში. ამას გარდა, ჩვენ ძალიან წარმატებით დავიწყეთ თანამშრომლობა საბანკო სექტორთან და ზოგადად ბიზნესთან. გასულ წელს, როდესაც უკვე სამრეწველო დარგების განვითარება დავიწყეთ, ჩვენ შევიმუშავეთ პროგრამა, რომელსაც დავარქვით ძალიან კარგი სახელი -“აწარმოე საქართველოში”. ეს არის გაგრძელება იმ ინიციატივის, რომელიც ბატონმა ბიძინა ივანიშვილმა და ჩვენმა მთავრობამ დაიწყო”, – განაცხადა ღარიბაშვილმა.


საქართველოს პრემიერ-მინისტრმა სახელმწიფო პროგრამის – “აწარმოე საქართველოში” წარმატებით განხორციელებისთვის ვიცე-პრემიერს, ეკონომიკისა და მდგრადი განვითარების მინისტრ, გიორგი კვირიკაშვილს და მის გუნდს, ასევე სოფლის მეურნეობის სამინისტროს მადლობა გადაუხადა.