არჩევნების პროცესში ჩემთვის ემოციურად ყველაზე მძიმე იყო მედიით გაზიარებული ინფორმაცია, რომელიც ამომრჩევლის მოსყიდვას ეხებოდა, განაცხადა საქართველოს პრეზიდენტმა, გიორგი მარგველაშვილმა ცოტა ხნის წინ გამართულ ბრიფინგზე და აღნიშნა, რომ იგი მეორე ტურს ელოდებოდა.

„ჩვენ უნდა ვიცოდეთ, რასთან გვაქვს საქმე, როდესაც ამომრჩეველი ყველაზე წმინდას და ყველაზე ძლიერს, რაც მას, როგორც მოქალაქეს აქვს, თავის ხმას, რომ განაპირობოს ხელისუფლების ფორმირება, აი, ამ ხმის გაყიდვის წინაშე დგას, ეს ჩემთვის ძალიან მძიმე არის... კიდევ ერთხელ ვხედავ, რაც არაერთხელ მინახავს, როგორ უჭირს მოსახლეობას, რა მძიმე ეკონომიკური ფონია, რა მძიმე მდგომარეობაში არიან, რომ ყველაზე წმინდა სამოქალაქო მანდატს - მანდატს, შექმნას ხელიუფლება, ეს შეიძლება გაცვალოს ამომრჩეველმა. ეს მაჩვენებს იმ მძიმე ეკონომიკურ ფონს, რომელიც ყოველთვის მთრგუნავდა და ახლაც მთრგუნავს“, აღნიშნა მარგველაშვლმა. 

მან მოუწოდა ხელისუფლებას, არ ოდესმე, არა ხვალ და ზეგ, არამედ მეორე ტურზევე უნდა იყოს გამოსწორებული ის დარღვევები, რომელზეც საერთაშორისო დამკვირვებლებმა მიგვითითეს.

მან ასევე მოუწოდა ამომრჩევლებს აქტიური მონაწილეობა მიიღონ მეორე ტურში. მისი თქმით, მეორე ტური არის უაღრესად მნიშვნელოვანი და მნიშვნელოვანია მასში ისეთივე აქტიურობით იყვნენ ჩართული საერთაშორისო დამკვირვებლები, როგორც ეს პირველ ტურში იყვნენ.