საქართველოს პრეზიდენტის, გიორგი მარგველაშვილის განცხადებით, „ქართულმა ოცნებამ" არჩევნების შედეგებით უნდა შეძლოს და წაიკითხოს საზოგადოების მთავარი გზავნილები. ქვეყნის მთავარსარდლის თქმით, შეცდომებსა და გასაკეთებელ საქმეებზე მისი პრეზიდნეტობის პერიოდში მმართველ გუნდს ყოველთვის მიუთითებდა, თუმცა, „ქართული ოცნებისგან" პასუხად მხოლოდ კრიტიკას და თავდასხმას იღებდა.

შეკითხვას, რა უთხრა ქართულმა საზოგადოებამ საპრეზიდენტო არჩევნების შედეგებით „ქართულ ოცნებას", გიორგი მარგველაშვილმა ასე უპასუხა:

„რა არის ჩემი შეხედულებით პოლიტიკურად სწორი ნაბიჯი და მცდარი, ამაზე ხუთი წლის განმავლობაში, ძალიან ღიად, მათ შორის, მედიით, ვეუბნებოდი ჩვენს მოქალაქეებს და პირველ რიგში, ხელისუფლებაში მყოფ ჯერ კოალიცია „ქართულ ოცნებას" და შემდეგ პარტია „ქართულ ოცნებას". მე ეს მისია მიმთავრდება და დავამთავრე, ახლა თვითონ შეძლონ და წაიკითხონ ის გზავნილები, რომლებიც მათ მისცა საზოგადოებამ. ხუთი წელიწადი ამას ვაკეთებდი, რომ ღიად და ყოველგვარი დაფარვის გარეშე, იმას, რაც გასაკეთებელი იყო და სადაც იყო შეცდომები, ამას ვეუბნებოდი. თუმცა, ხუთი წლის განმავლობაში, მე მხოლოდ კრიტიკა მესმოდა ამის გამო და უსამართლო თავდასხმები", განაცხადა გიორგი მარგველაშვილმა ცოტა ხნის წინ, ავლაბრის რეზიდენციაში გამართულ საგანგებო ბრიფინგზე.