მეორე ტურში გასული „ძალა ერთობაშია“-ს საპრეზიდენტო კანდიდატი გრიგოლ ვაშაძე ირწმუნება, რომ იგი პირველ ადგილზე იმყოფება და შესაბამისად, მოუწოდებს ცენტრალურ საარჩევნო კომისიას შეიტანოს კორექტირება იმ მონაცემებში, რომელიც მის ვებვერდზეა გამოქვეყნებული და რომლის მიხედვითაც პირველ ადგილს „ქართული ოცნების“ მხარდაჭერილი დამოუკიდებელი საპრეზიდენტო კანდიდატი, სალომე ზურაბიშვილი იკავებს.

„ჩვენ მეორე ტურში აუცილებლად მოვიგებთ, ისევე როგორც მოვიგეთ პირველი ტური, მაგრამ ჩვენი ამომრჩეველი არ გვაპატიებს, რომ თუნდაც ეს გამარჯვება მოვაპარინოთ - პირველი ტურის გამარჯვება. ამიტომ ცესკო-ს მინდა მივმართო თხოვნით, შეიტანეთ კორექტივები, აღიარეთ შეცდომები და სულ ნუ ააფეთქებთ იმ მცირე ნდობას, რომელიც თქვენ მიმართ აქვს დარჩენილი საქართველოს ამომრჩეველს“, განაცხადა რამდენიმე წუთის წინ ბრიფინგზე ცესკოს ოფიციალური პირველადი მონაცემებით მეორე ადგლზე გასულმა საპრეზიდენტო კანდიდატმა, გრიგოლ ვაშაძემ.

ვაშაძემ, როგორც ეს თავად განაცხადა, გაყალბების ამსახველი დოკუმენტები წარადგინა და ასობით ოქმიდან რამდენიმე წარმოადგინა.

„4 რეგიონი, სადაც შევარდნაძის დროიდან შემორჩენილი ტექნოლოგიებით და ტრიუკებით, ჩაყრებით, კარუსელებით და ა.შ. მუდმივად აყალბებენ არჩევნებს, 90-იან წლებში და ეხლა, გადმოიღეს ეს დღეს. ასპინძა, ნინოწმინდა, ახალქალაქი და მარნეული. ერთი ხელით შევსებული ორი ოქმი, სადაც ჩვენ ახალქალაქში გვაქვს აღებული ნული ხმა. ანუ იმ რაიონში არ ცხოვრობდა არავინ აბსოლუტურად, რომელიც 11-იდან რომელიმე პარტიის წევრი იქნებოდა, ან არ ცხოვრობდა არავინ, ვისაც ნათესავი ან კეთილმსურველი ჰყავს გაერთიანებულ ოპოზიციაში და არ ცხოვრობდა კერძოდ იმ უბანში არც ერთი ადამიანი, რომელიც ჭკუის დაკარგვამდე არ იყოს შეყვარებული ბიძინა ივანიშვილის კანდიდატზე. თქვენ ამის გჯერათ ერთი წუთით?!“, იკითხა გრიგოლ ვაშაძემ და ისევ ცესკოს მიმართა: „ის ძალიან მკაცრი დასკვნები, რასაც საერთაშორისო სადამკვირვებლო ორგანიზაციები დადებენ, გაძლევთ იმის საშუალებას, რომ თქვენ კორექტივები შეიტანოთ“.