პარლამენტის ფრაქცია „ქართული ოცნების" თავმჯდომარის, მამუკა მდინარაძის განცხადებით, პარტიაში საკადრო ცვლილებები იგეგმება, მისივე განმარტებით, ცვლილებები მინისტრთა კაბინეტს არ შეეხება.

როგორც მდინარაძემ დღეს, პარტიის ცენტრალურ ოფისში ჟურნალისტებს განუცხადა, გუშინ და დღეს საკონსულტაციო შეხვედრები გაიმართა. მისი ინფორმაციით, შეხვედრას ესწრებოდა ბიძინა ივანიშვილი, მაგრამ არ ესწრებოდა პრეზიდენტობის კანდიდატი სალომე ზურაბიშვილი.

„დღის განმავლობაში შეხვედრას ბიძინა ივანიშვილი ესწრებოდა, სალომე ზურაბიშვილი ამ შეხვედრებში არ მონაწილეობდა. ბევრი რამ არის შტაბში გადასალაგებელი, მათ შორის პარტიულ მუშაობასთან დაკავშირებით. არ გამოვრიცხავთ ახალი სახეების შემოსვლას. ბუნებრივია, კიდევ უფრო გააძლიერებს პატია თავის მუშაობას და შედეგებიც იქნება ადეკვატური....

პარტიაში საუბარია გადახალისებაზე, ახალი წევრების შემოყვანაზე, მათ შორის, სამთავრობო დონეზე უდიდესი გამოწვევების წინაშე დგას ეკონომიკური გუნდი იმიტომ, რომ მთავარი პრობლემა, რომელიც აწუხებს მოსახლეობას, ეს არის სოციალური მდგომარეობა. ადამიანებს ამ მიმართულებით მეტი დინამიკა, მეტი ტემპი სჭირდებათ. „ქართული ოცნების“ მთავარი გამოწვევა არის, მოქალაქეებთან კოორდინაცია სწრაფად და მეტად განახორციელოს. ასევე, გარკვეული საკითხები დაკავშირებულია მენეჯმენტთან, მათ შორის კომუნიკაციის კუთხით. ძალიან ხშირად გვსაყვედურობენ, რომ რასაც ვაკეთებთ, ისიც არ მიდის საზოგადოებამდე. მინისტრების ცვლილებაზე საუბარი არ არის", განაცხადა მდინარაძემ.