არასამთავრობო ორგანიზაცია „პოზიცია“ სოციალურ და ონლაინ მედიაში ყალბი ინფორმაციების გავრცელების წინააღმდეგ გამოდის და შესაბამის ორგანოებს მოუწოდებს სათანადო რეაგირება მოახდინონ აღნიშნულ ფაქტებთან დაკავშირებით.


ორგანიზაციის აღმასრულებელი დირექტორის, გურამ ადამაშვილის განცხადებით, განსაკუთრებით აღმაშფოთებელი იყო რამდენიმე დღის წინათ ჯერ სოციალური ქსელით ანა მამრიკაშვილის გვერდზე, შემდეგ კი რამდენიმე საინფორმაციო სააგენტოს მიერ გადაუმოწმებლად გავრცელებული  ინფორმაცია იმის შესახებ, თითქოს ხანდაზმულ ანა გაგუას, კუთვნილი 1000 ლარის ნაცვლად, თბილისის მუნიციპალიტეტის მერიამ შპს „ჰერმესის“ სარიტუალო მომსახურება შესთავაზა, რაც, როგორც შემდგომ გაირკვა, სრული სიცრუე აღმოჩნდა.


ადამაშვილის თქმით, ცოტა ხნის წინათ ასევე ადგილი ჰქონდა ფაქტს, როცა ზოოპარკიდან დაკარგული ვეფხვი იძებნებოდა და დედაქალაქში მოსახლეობა ისედაც საკმაოდ დაძაბული იყო, არასრულწლოვანებმა ვეფხვის ხმა ჩაიწერეს ტელეფონში და ამ ხმას ფანჯრიდან, ხმის გამაძლიერებლის მეშვეობით ქუჩაში გადასცემდნენ.


„მე არ შევუდგები ყველა მსგავსი ფაქტის ჩამოთვლას. საზოგადოების დიდი ნაწილისთვის ისედაც ნათელია, რომ სხვადასხვა თემატიკასთან დაკავშირებით ამგვარი დეზინფორმაცია ხშირად მიზანმიმართულად ვრცელდება და უმეტესწილად ამგვარი ცრუ ინფორმაციები სახელმწიფო სტრუქტურების დისკრედიტაციას ემსახურება. მაგალითად, თბილისის მერიის წინააღმდეგ რამდენიმე დღის წინათ შავი ფიარის აგორების მცდელობას ჰქონდა ადგილი, როცა, დარწმუნებული ვარ, შეგნებულად გავრცელდა არასწორი ინფორმაცია იმის შესახებ, თითქოს 100 წელს მიტანებულ ხანდაზმულ ქალბატონს, ანა გაგუას, თბილისის მერიამ კუთვნილი 1000 ლარის ნაცვლად, შპს „ჰერმესის“ სარიტუალო მომსახურება შესთავაზა. ამგვარი ამაზრზენი აზრი როგორ შეიძლება ნორმალური ადამიანის თავში გაჩნდეს. მოვითხოვ სამართალდამცველებისაგან შესაბამის რეაგირებას, რათა სხვებიც დაფიქრდნენ, სანამ რაიმე ასეთ, ცრუ ინფორმაციას გაავრცელებენ“, - აცხადებს გურამ ადამაშვილი.