საქართველოს მესამე პრეზიდენტი მიხეილ სააკაშვილი აცხადებს, რომ გრიგოლ ვაშაძის პრეზიდენტობის შემთხვევაში, მისთვის შეწყალების თხოვნით მიმართვას არ აპირებს.

სააკაშვილი ამბობს, რომ „არავისი შესაწყალებელი არაფერი მჭირს", რადგან როგორც, მესამე პრეზიდენტი აცხადებს, არაფერი დაუშავებია „ქართული სახელმწიფოს აშენების გარდა" და საკუთარ უფლებებს დაიცავს სასამართლოში, როცა ის „ივანიშვილის გავლენისგან გათავისუფლდება".

„მთელი დღე მესმის, რომ ჩემით აშინებენ ადამიანებს, რომ მოვა ვაშაძე და შეიწყალებს სააკაშვილს. ჯერ ერთი, მე არავის შესაწყალებელი არაფერი არ მჭირს. არც მარგველაშვილისთვის მიმიმართავს შეწყალებაზე და არც პრეზიდენტ ვაშაძეს ვაპირებ, მივმართო შეწყალებისთვის. ვისი რა შესაწყალებელი მჭირს. ალბათ, ვიღაცაში გერევით. მე თითზე გადასახვევი არაფერი წამიღია საქართველოდან. რაც მქონდა, ყველაფერი ჩავდე საპრეზიდენტო ბიბლიოთეკაში, რომელიც ჩემი საკუთრებაც არ არის და წიგნებიც ჩავიტანეთ საკუთარი ხელით. ჩემი ოჯახი ცხოვრობს იქ, სადაც ცხოვრობდა ჩემი პრეზიდენტობის დროს და მე არც ერთი სხვა დანაშაული არ მიმიძღვის, გარდა იმისა, რომ ავაშენე ქართული სახელმწიფო.... მე არ ვაპირებ შეწყალების თხოვნას, გრიგოლ ვაშაძეს არ მოუწევს ჩემი შეწყალება. მე ვაპირებ ჩემი უფლებების სამართლებრივად დაცვას, როცა საქართველოში იქნება ნორმალური სასამართლო. მე ამას მივაღწევ“, განაცხადა მიხეილ სააკაშვილმა „რუსთავი 2"-ის გადაცემაში „არჩევანი" პირდაპირი ჩართვისას.