იაპონელმა მფრინავმა, რომელიც ჰიტროუს აეროპორტში სიმთვრალის გამო დააკავეს, აღიარა, რომ დაშვებულ ნორმაზე 9-ჯერ მეტი ოდენობის ალკოჰოლი ჰქონდა მიღებული.

42 წლის კაცუტოში ჯიცუკავა, რომელიც „Japan Airlines“-ში მუშაობს, 28 ოქტომბერს, ალკოტესტის ჩატარების შემდეგ დააკავეს. მისი სისხლის 100 მილილიტრში 189 მილიგრამი ალკოჰოლი იქნა აღმოჩენილი, მაშინ როცა მფრინავისთვის კანონით დაშვებული ნორმა 20 მილიგრამს შეადგენს, იტყობინება ბრიტანული სამაუწყებლო კორპორაცია (BBC).

იაპონური ტელეკომპანია NHK-ის ცნობით, პოლიციას ეკიპაჟის ავტობუსის მძღოლმა შეატყობინა, რომ მფრინავს ალკოჰოლის სუნი ასდიოდა.

მფრინავი იმ ეკიპაჟის წევრებს შორის იმყოფებოდა, რომელთაც „იაპონური ავიახაზების“ კუთვნილი „ბოინგ 777“-ით ლონდონიდან ტოკიოში უნდა განეხორციელებინათ ფრენა, მაგრამ გამგზავრების დრომდე 50 წუთით ადრე, დიდი ოდენობით ალკოჰოლის მიღებაში ეჭვმიტანილმა მფრინავმა ალკოტესტი ვერ გაიარა და ფრენა 69 წუთის დაგვიანებით განხორციელდა.

ავიაკომპანიამ განცხადება გაავრცელა და ბოდიში მოუხადა მგზავრებს, ამასთან, პირობა დადო, რომ „დაუყოვნებელ ქმედებებს გაატარებს, რათა მომავალში ნებისმიერი მსგავსი შემთხვევა იყოს აღკვეთილი“, რადგანაც „უსაფრთხოება ჩვენს ყველაზე დიდ პრიორიტეტად რჩება“.

BBC-ის ცნობით, ინგლისში, უელსში და ჩრდილოეთ ირლანდიაში ავტომანქანის ნასვამ მდგომარეობაში ტარება კანონდარღვევად არ ითვლება, თუკი სისხლში ალკოჰოლის ოდენობა 80 მილიგრამს არ აღემატება, ხოლო მფრინავებისთვის ეს შეზღუდვა 20 მილიგრამს შეადგენს.

კაცუტოში ჯიცუკავა პატიმრობაში რჩება. მისი სასამართლო პროცესი 29 ნოემბერს გაიმართება.

ივნისში, „ბრითიშ ეარვეისის“ მფრინავი, ჯულიან მონაგანი, რომლის სისხლშიც 86 მილიგრამი ალკოჰოლი აღმოაჩინეს, გატვიკის აეროპორტში დააპატიმრეს და 8-თვიანი პატიმრობა მიუსაჯეს.