„მთავრობამ მიიღო გადაწყვეტილება პარლამენტიდან უკან გაიწვიოს მარიხუანას კულტივაციის შესახებ კანონპროექტი“, განაცხადა შინაგან საქმეთა მინისტრმა გიორგი გახარიამ პატრიარქთან შეხვედრის დასრულების შემდეგ.

„ჩვენთვის, შინაგან საქმეთა სამინისტროსთვის დღევანდელი შეხვედრიდან ყველაზე მნიშვნელოვანი იყო მარიხუანასთან დაკავშირებული ის საკანონმდებლო ინიციატივები, რომლებიც მთავრობამ  წარადგინა. პირველი, რა თქმა უნდა, ყველაზე მნიშვნელოვანი იყო რეგულირების ნაწილი, რომელიც პარლამენტში შევიტანეთ და უდიდესი შედეგი ექნება ამ კანონს, როგორც უსაფრთხოების, ისე რეგულირების ნაწილში, ასევე მეორე ნაწილი, რომელიც გახლდათ კულტივაციის თემა, სამედიცინო მიზნებისთვის. რა თქმა უნდა, კონტექსტი არსებობს, ეს არის პოლიტიკური კონტექსტი, რომელიც დაედო ამ საკანონმდებლო ინიციატივას. ჩვენ თავიდანვე ვთქვით, რომ ერთმნიშვნელოვნად ჩვენთვის ძალზე დიდი ფაქტორია, რომ ამ კანონის ირგვლივ მოხდეს კონსენსუსი. ამ კონსენსუსი მიღწევა ამ პოლიტიკური კონტექსტიდან გამომდინარე, არჩევნების მათ შორის, ამ ეტაპზე შეუძლებელია და იმ საზოგადოებრივი რეაქციიდან გამომდინარე, მიღებულ იქნა გადაწყვეტილება, რომ ეს კანონპროექტი გამოვიტანოთ. ეს იყო დღეს პატრიარქთან შეხვედრის ძირითადი თემა. რა თქმა უნდა, ეს იყო საპატრიარქოს და პატრიარქის პოზიციაც და ჩვენ დავთანხმდით, რომ ამ კანონპროექტს მთავრობა უახლოეს პერიოდში გამოიწვევს [პარლამენტიდან]“, განაცხადა მინისტრმა გახარიამ.