პარლამენტის თავმჯდომარე ირაკლი კობახიძე „ნაციონალური მოძრაობის“ ხელისუფლებაში დაბრუნებას გამორიცხავს და დარწმუნებით ამბობს, რომ „ამის გარანტია არის საზოგადოების განწყობა“, რაც მისი თქმით, საპრეზიდენტო არჩევნების მეორე ტურზე გამოჩნდება.

„ჩვენთვის ძალიან მნიშვნელოვანია ქართული საზოგადოება დადგეს იმ იდეის გვერდით, რასაც ჰქვია ნაციონალური მოძრაობის არდაბრუნება. რა თქმა უნდა, ნაცმოძრაობის დაბრუნების შანსი რეალურად არ არსებობს და ამის გარანტია არის საზოგადოების განწყობა და ამას ჩვენ დავინახავთ, რა თქმა უნდა, არჩევნების მეორე ტურში“, განაცხადა ირაკლი კობახიძემ საპატრიარქოში საქართველოს კათოლიკოს-პატრიარქთან, უწმინდესთან და უნეტარესთან ილია მეორესთან გამართული შეხევდრის დასრულების შემდეგ და შეკითხვის - რამდენად მოსალოდნელია რიგგარეშე საპარლამენტო არჩევნები? - საპასუხოდ თქვა: „რიგგარეშე საპარლამენტო არჩევნები არის გამორიცხული. ეს შემიძლია დანამდვილებით გითხრათ“.