„ქართული ოცნება - დემოკრატიული საქართველოს" გენერალური მდივნის განცხადებას, რომ ოპოზიცია სიცრუეს ავრცელებს იმასთან დაკავშირებით, რომ ჰააგის სისხლის სამართლის სასამართლოში, შესაძლოა, ქართველი სამხედროები გასამართლდნენ, „ევროპულ საქართველოში" ეხმაურებიან.

პარტიის წარმომადგენელი ოთარ კახიძე კახა კალაძეს მოუწოდებს, რომ „ეყოს ვაჟკაცობა" და თქვას, რომ საქართველოს ომი არ დაუწყია.

„კახა კალაძეს, თითების შვერის ნაცვლად, უნდა ეყოს ვაჟკაცობა, გამოვიდეს და თქვას, რომ საქართველოს ომი არ დაუწყია, საქართველოს მაშინდელ ხელისუფლებას ომი არ დაუწყია და ეს ერთი და იგივეა და დადგნენ ამ ვიწროპარტიულ ინტერესებზე, პოლიტიკურ ბოღმაზე მაღლა.

თუ ვინმემ გაამტყუნა ქართველი სამხედროები, მაშინ გამტყუნდება საქართველო, ვინაიდან ეს სამხედროები ინდივიდუალურ, დამოუკიდებელ მოქმედებებს არ ახორციელებდნენ, ისინი მოქმედებდნენ მაშინდელი ხელისუფლების, მაშინდელი საქართველოს ხელმძღვანელობის დავალებით.

ჰააგის ტრიბუნალს საქმე წულუკიანმა გადასცა. ხომ ვიცით, რომ თქვა, რომ მე აქ ვეღარ ვიძიებ, თქვენ გამოიძიეთო. რატომ გააკეთა ეს, რატომ დააყენა საფრთხის ქვეშ, რატომ გარისკა, მე ვეჭვობ, რომ აქ ძალიან მძიმე შემთხვევასთან გვაქვს საქმე", ამბობს ოთარ კახიძე.