პრემიერ მინისტრ მამუკა ბახტაძის განცხადებით, 31 დეკემბრამდე 600 000-ზე მეტი მოქალაქე შავი სიიდან ამოვა.

როგორც ცოტა ხნის წინ გამართულ საგანგებო ბრიფინგზე მთავრობის მეთაურმა აღნიშნა, მოქალაქეებს, რომელთაც დავალიანება აქვთ და შავ სიაში არიან, ვალი გაუნულდებათ. ვალების განულება კი, 15 დეკემბერს დაიწყება და 31 დეკემბერს დასრულდება.

„მადლობა ფონდ „ქართუს“. რომ არა ფონდის მხარდაჭერა, ამ ძალიან მნიშვნელოვანი ინიციატივის რეალიზება ვერ მოხდებოდა. მინდა, განვუმარტო საზოგადოებას – ე.წ. შავ სიაში დაფიქსირებული ვალების თითქმის 95 პროცენტი შედგება სესხებიდან, რომლის ძირი თანხა არ აღემატება 2000 ლარს. საუბარია 600 000-ზე მეტი მოქალაქის ფინანსურ ვალდებულებაზე, ბანკების, ონლაინ ორგანიზაციების თუ სხვადასხვა საფინანსო ინსტიტუტების მიმართ, რომელიც ჯამში შეადგენს დაახლოებით მილიარდ ნახევარ ლარს. დღევანდელი გადაწყვეტილებით, ეს დავალიანება უნულდება ჩვენს მოქალაქეებს. აღსანიშნავია, რომ ამ კატეგორიაში შედიან სოციალურ დაუცველი და შეზღუდული შესაძლებლობის მქონე ჩვენი მოქალაქეები. მიმდინარეობს  მუშაობა მოვალეთა რეესტრის ბაზებზე. ვალების განულების პროცესი დაიწყება 15 დეკემბერს და 31 დეკემბრამდე დასრულდება“, განაცხადა მამუკა ბახტაძემ.