საპარლამენტო ფრაქცია „ქართული ოცნების“ თავმჯდომარე მამუკა მდინარაძემ საქართველოს პარლამენტის ბიუროს სხდომაზე განაცხადა, რომ ფონდი „ქართუ“ გამოთქვამს მზადყოფნას, რამდენიც საჭირო იქნება პორტფელის შესასყიდად, იმდენი გადაუხადოს კომერციულ ბანკებს. 

„სახელმწიფოს როლი ის იყო, რომ რამდენიმე თვეა, ამაზე მოლაპარაკებები მიმდინარეობს. მათ შორის მედიატორია სახელმწიფო, რომელიც ძალიან აქტიურად არის ჩართული. დღეს დაიდო კონკრეტული შედეგი, რომელიც რომან გოცირიძეს არ უხარია. 600 000 ადამიანი შეძლებს, გაპრობლემებული ვალების გარეშე შეხვდეს ახალ წელს. გუშინ, სამის ნახევარზე მიიღეთ კონკრეტული პირებისგან ინფორმაცია, რომ დღეს ცნობილი იქნებოდა ეს გადაწყვეტილება. გამოვარდა თქვენი ე.წ. კანდიდატი, ხელისა და ფურცლების კანკალით დააანონსა, რომ იქნებ მიეწერა რამენაირად, ეს გააკეთოთო და რა ქნა?! თუ დღეს დანაშაულს უწოდებთ, დანაშაულისკენ მოგვიწოდა, თუ რაში იყო საქმე? ჩამოყალიბდით, რას ამბობთ, ცუდია? კარგია? მაგრამ მთავარია ერთი – რამდენიმეთვიანი მუშაობის შედეგად, ხელისუფლებამ, ბანკების, ფონდ „ქართუს“ ხელშეწყობითა და დიდი დამსახურებით მიაღწია იმას, რომ 600 000 ადამიანი და ოჯახი შეხვდება ახალ წელს ვალების გარეშე“,  განაცხადა მამუკა მდინარაძემ.