მტკიცედ ვუჭერთ მხარს საქართველოს, საერთაშორისოდ აღიარებული საზღვრების ფარგლებში. ჩვენ მოხარულნი ვართ ვიხილოთ თქვენი, როგორც აღმოსავლეთ პარტნიორობის ძლიერი ქვეყნის ეკონომიკის აყვავება. ვფიქრობ, ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმება, ასოცირების შესახებ შეთანხმება, ასევე მომავალში აღმოსავლეთ პარტნიორობა+, დაეხმარება თქვენს ქვეყანას ეკონომიკურ სტაბილურობაში. ჩვენ უპირობოდ ვუჭერთ მხარს თქვენს გრძელვადიან ევროპულ მისწრაფებებს. ვიზალიბერალიზაცია, რომელიც ძალაში შევიდა ა.წ. მაისიდან ასევე ეხმარება აღნიშნულ პროცესს", განაცხადა ევროპარლამენტარმა ჩარლზ ტანოკმა ბრიუსელში, ევროპარლამენტის საგარეო ურთიერთობათა კომიტეტის სხდომაზე.

ევროპარლამენტარი მიესალმა საქართველოში საპრეზიდენტო არჩევნების მშვიდობიან და დემოკრატიულ მიმდინარეობას. ასევე განაცხადა, რომ აღსანიშნავია საქართველოს მიერ ქვეყანაში მშვიდობის, კეთილდღეობისა და უსაფრთხოებისთვის ევროპული პროექტების დამსახურების დაფასება.

ჩარლზ ტანოკმა ასევე ისაუბრა რუსეთის საგარეო პოლიტიკის შესახებ, რომელიც ეწინააღმდეგება თავისუფალი და ევროპული საქართველოს იდეას. მისი თქმით, ევროკავშირი წინ უნდა აღუდგეს რუსეთის მიერ საქართველოს ტერიტორიების მილიტარიზაციას, ასევე აქტიურ დისკრიმინაციას, რომელიც მიმდინარეობს ეთნიკური ქართველების მიმართ აფხაზეთსა და სამხრეთ ოსეთის რეგიონში.

„ვუერთდები ჩემს კოლეგებს, გისურვებთ ყოველივე საუკეთესოს. ბრიტანელი ევროპარლამენტარები ყოველთვის მტკიცედ უჭერდნენ მხარს საქართველოს, მის მიერ კანონის უზენაესობის, დემოკრატიისა და ადამიანის უფლებათა დაცვას", განაცხადა ევროპარლამენტარმა, როგორც ამას საქართველოს საგარეო უწყება იტყობინება.