განათლებისა და მეცნიერების სამინისტროს წარმომადგენლებმა პროგრამა „ჩემი პირველი კომპიუტერი“-ს ფარგლებში, მესტიის მუნიციპალიტეტის ათი წარჩინებული მეათეკლასელი მოსწავლე პორტაბელური კომპიუტერებით დააჯილდოვეს.

კომპიუტერები მესტიის #2, მესტიის #1, ხაიშის, ჭუბერის და ლახამულას საჯარო სკოლის იმ მოსწავლეებს გადაეცათ, რომლებმაც საბაზო საფეხური მე-7, მე-8 და მე-9 კლასები წარჩინებით დაასრულეს და ყველა საგანში 10-ქულიანი შეფასება მიიღეს.

მოსწავლეთა დაჯილდოვების ღონისძიება მესტიის #2 საჯარო სკოლაში გაიმართა, რომელსაც ესწრებოდნენ მესტიის მუნიციპლიტეტის ადგილობრივი თვითმმართველობის წარმომადგენლები, მესტიის საგანმანათლებლო რესურს ცენტრის თანამშრომლები, პედაგოგები და მშობლები.

ღონისძიებას მუსუიკალურად აფორმებდნენ მესტიის ქორეოგრაფიული ანსამბლი „ბანგურიანი“, ჭუბერის საჯარო სკოლის მომღერალთა გუნდი „ნენსკრა“ და მესტიის #1 საჯარო სკოლის მომღერალთა გუნდი, ასევე ნიჭიერი ახალგაზრდა შემსრულებლები - ხაიშის საჯარო სკოლის მოსწავლე მარიამ გოშთელიანი და ლენჯერის #1 საჯარო სკოლის მოსწავლე თეკლე შუკვანი.

მოსწავლეებს კომპიუტერები განათლებისა და მეცნიერების სამინისტროს წარმომადგენლებმა და მესტიის საგანმანათლებლო რესურსცენტრის დირექტორმა, დარეჯან ნიგურიანმა პირადად გადასცეს.

პროექტი განათლებისა და მეცნიერების სამინიტროს მიერ რამდენიმე წელია წარმატებით ხორციელდება. პროექტის მიზანია, მოსწავლეების მოტივაციის ამაღლება და სწავლის პროცესში თანამედროვე ტექნოლოგიების გამოყენების ხელშეწყობა.

ინფორმაციას მესტიის მერიის პრესსამსახური ავრცელებს.