საქართველოს ეკონომიკისა და მდგრადი განვითარების მინისტრი ეხმაურება „რუსთავი 2"-ის მიერ ბიზნესმენ თამაზ ელიზბარაშვილის ოჯახის სახელით გავრცელებულ ინფორმაციას, რომლის მიხედვითაც, ბანკ „ქართუს“ წარმომადგენლებმა ბიზნესმენებს 10 დეკემბრამდე 20 მილიონი ლარი მოსთხოვეს.

„მე ამასთან დაკავშირებით არ მინდა კომენტარის გაკეთება. ასეთი კომენტარები ძალიან ბევრი ჟღერს წინასაარჩევნო პერიოდში. ენას ძვალი არ აქვსო, როგორც იტყვიან და შეიძლება ნებისმიერი რამე დაგვბრალდეს, მაგრამ აქ ობიექტურობაზე ხომ ლაპარაკი არ არის, აქ არის დაბრალებაზე და სიტყვით ნებისმიერი რამე შეიძლება ითქვას. თუ რეალურად ამ ბრალდებას აქვს რაიმე საფუძველი, ამისთვის არსებობს პროკურატურა, რომელმაც შეიძლება გამოიძიოს და დაგვიდოს დასკვნა. რა თქმა უნდა, დავინტერესდებით, თუ ისეთი სერიოზული საკითხია, რომ პროკურატურამ მიიღო ეს გამოძიებაში", განაცხადა გიორგი ქობულიამ ჟურნალისტებთან საუბრისას.

„რუსთავი 2"-ის ინფორმაციით, „კურიერთან” საუბრისას ბიზნესმენ თამაზ ელიზბარაშვილის ოჯახის წევრი რამდენიმე დღის წინ „ქართუ ბანკში“ გამართული შეხვედრის დეტალებს ჰყვება.

ტელეკომპანიის ცნობით, ბიზნესმენის ყოფილი მეუღლე აცხადებს, რომ „ქართუ ბანკში“ ბიზნესმენს 10 დეკემბრამდე 20 მილიონი ლარის მიტანა დაავალეს და მისი მტკიცებით, ბიზნესმენებს ყოველთვიურად 300 ათასი ლარის შეტანასაც აიძულებენ, თუმცა ეს თანხა არჩევნების მოახლოებასთან ერთად იზრდება.

„რუსთავი 2" იუწყება, რომ აღნიშნულ საკითხზე მიმოწერა ბიზნესმენსა და „კურიერის" ჟურნალისტს შორის სოციალურ ქსელში შედგა.