„ქართული ოცნების" ყოფილი მხარდამჭერი გიორგი გაბედავა მმართველ პოლიტიკურ ძალას ძალადობაში ადანაშაულებს.

როგორც გაბედავამ „რუსთავი 2"-თან ინტერვიუში განაცხადა, მას შემდეგ, რაც სისტემის წინააღმდეგ ბრძოლა დაიწყო, მას სდევნიდნენ - იძულებული გახდა, ქვეყანა დაეტოვებინა და 5 თვეა, შვედეთში, ოჯახთან ერთად ცხოვრობს.

„პატიმრებმა მოვიყვანეთ ხალხი არჩევნებზე, ვატო შაქარაშვილის სიყვარულით კი არ მოსულა იქ ვინმე და ირაკლი კობახიძის თმა კი არ მოსწონდა ვინმეს, ჩვენ მოვუყვანეთ ეს ხალხი არჩევნებზე და ჩვენი, პატიმრების ხათრით მოდიოდა ხალხი არჩევნებზე. სამი თვის მანძილზე მალოდინეს ციხეში, რომ სიმართლე დამემტკიცებინა, ციხიდან გამოსვლის შემდეგ, სასამართლოში შევიტანე და არც კი იხილავენ ჩემს საქმეს. მე უბრალოდ ვებრძოდი რეჟიმს და მეგონა, რომ რაღაც შეიცვლებოდა, მაგრამ რეჟიმი იგივე დარჩა. ძალიან ბევრი ადამიანი, ვინც არ მიეყიდა „ოცნებას“, ყველას ასეთ დღეში ჩააგდეს. მე არ მინახავს ადამიანი, „ოცნებას" არ მიეყიდოს და შავ დღეში არ იყოს. პირდაპირ გეუბნებიან, შენ თუ ცუდს დაწერ ჩვენზე, ამ პოსტს თუ არ წაშლი, შენ თუ ამ ფარულ ჩანაწერს არ წაშლი, ოჯახს გაგინადგურებთ, ცოლი გყავთ, ფრთხილად იყავი, ფეხი არ წამოდოს, მუცელი არ მოეშალოს, ასეთ რაღაცებს გვეუბნებიან, „ნაცები" არ კადრულობდნენ ამას. იგივე სისტემაა, არაფერი შეცვლილა", განაცხადა გიორგი გაბედავამ, რომელმაც ასევე გაიხსენა ისტორია, რომლის მიხედვითაც, მის წინააღმდეგ ცრუ ჩვენების მიცემისთვის, მისი მეგობარი სუს-ის მაღალჩინოსნებმა დააკავეს და ოქროყანის ტყეში აიყვანეს.

გიორგი გაბედავა ამბობს, რომ მის მეგობარს არაადამიანურად მოეპყრნენ და ფაქტი შემდეგ ვიდეოკამერით გადაიღეს, კადრებით კი აშანტაჟებდნენ, რომ მას გაბედავას წინააღმდეგ ჩვენება მიეცა.

„დამიკავშირდა ადამიანი, რომელსაც ციხიდან ვიცნობდი, რომ მან საზარელი რამ მომიყვა და მივხვდი, რომ საქართველოში გაჩერება აღარ შემეძლო. მან ამიხსნა ძალიან მძიმე სურათი დამიხატა, თუ როგორ აიყვანეს ოქროყანაში სუს-ის მაღალჩინოსნებმა, როგორ აწამეს ის იმის სანაცვლოდ, რომ ეთქვა ჩემზე, რომ მე თურმე ვაუპატიურებდი პატიმრებს ციხეში. ამ ბიჭს რაც უქნეს „ქართული ოცნების“ მაღალჩინოსნებმა, ციხეში არ გაუკეთებიათ მისთვის „ნაციონალური მოძრაობის“ წევრებს", აცხადებს გაბედავა.