არჩევნებამდე ერთი დღით ადრე გაერთიანებული ოპოზიციის პრეზიდენტობის კანდიდატი, გრიგოლ ვაშაძე მოსახლეობას მიმართავს.

ვაშაძის თქმით, ხვალ ყველა უნდა მივიდეს არჩევნებზე და ხმა ქვეყნის წინსვლასა და განვითარებას მისცენ.

„ძალიან მნიშვნელოვანია, რომ ყველა თქვენთაგანი მობრძანდეს ხვალ არჩევნებზე, გამოიყენოს თავის კონსტიტუციური უფლება, შეასრულოს თავის კონსტიტუციური ვალდებულება და ხმა მისცეს ქვეყნის კეთილდღეობას და წინსვლას. საქართველოს სასწრაფოდ სჭირდება პოლიტიკური და ეკონომიკური რეფორმები, რომ ჩვენს ქვეყანას აღარასდროს მოუწიოს თავისი შვილების ემიგრაციაში გაგზავნა, აღარასოდეს მოუწიოს ოლიგარქის მმართველობა და ერთხელ და სამუდამოდ დავამთავროთ ერთპიროვნული და ერთპარტიული მმართველობა ქვეყანაში.

მიეცით ხმა გაერთიანებულ ოპოზიციას იმისათვის, რომ მან სასწრაფოდ დაიწყო მუშაობა პოლიტიკურ და ეკონომიკურ რეფორმებზე, სასწრაფოდ დაიწყოს მუშაობა 400-ლარიან პენსიაზე, სასწრაფოდ დაიწყოს მუშაობა 1000-ლარიან ხელფასზე ჩვენი პედაგოგებისთვის, რომლებიც სამშობლოს მომავალ თაობას უზრდიან.  დაიწყონ სასწრაფოდ მუშაობა იმისათვის, რომ პოლიციელის ხელფასი გახდეს 2000 ლარი, დაიწყონ სასწრაფოდ მუშაობა იმისათვის, რომ ჩვენს ჯარისკაცებს, ჩვენს ოფიცრებს, ადამიანებს, ვინც შეიარაღებულ ძალებში იცავენ სამშობლოს და მათ ოჯახებს  ღირსეული ცხოვრების პირობები ჰქონდეთ.

ჩვენ აღარ გვჭირდება ერთპიროვნული და ერთპარტიული მმართველობა, ჩვენ აღარ გვჭირდება ბანკები და მიკროსაფინანსო ორგანიზაციები, რომლებიც წისქვილის ქვასავით ჰკიდიან ეკონომიკას.

ჩვენ გვჭირდება ნორმალური, დემოკრატიული საზოგადოება, რომელიც არ იქნება დაპირისპირებული, არ იქნება გახლეჩილი და იქნება ერთად შეკრული ეროვნული მიზნების მისაღწევად. ამის გარანტია იქნება მეორე ტურში გაერთიანებული ოპოზიციის გამარჯვება, ამის გარანტია იქნება ის, რომ საქართველოში უახლოეს მომავალში იქნება ეროვნული მრავალპარტიული კოალიციური მთავრობა, რომელიც ე.წ. ხელისუფლებას არ მისცემს იმის შესაძლებლობას, რომ საქართველოს მოქალაქის მიერ სიმწრით მოპოვებული დემოკრატიული რეპუტაცია ასე უგონოდ და უნიჭოდ ფლანგოს.

ხვალ საპრეზიდენტო არჩევნების მეორე ტურია. გელოდებით გაერთიანებული ოპოზიცია და გრიგოლ ვაშაძე“, მიმართავს გრიგოლ ვაშაძე ამომრჩეველს.