„აბსოლუტურად მნიშვნელობა არ აქვს რა უსულო საგანს შეიტანენ ისინი პრეზიდენტის სასახლეში. ამ ხელისუფლების საქმე დამთავრებული არის“, განაცხადა „ერთიანი ნაციონალური მოძრაობის“ და კიდევ სხვა 10 პოლიტიკური პარტიის გაერთიანება „ძალა ერთობაშია“-ს საპრეზიდენტო კანდიდატმა გრიგოლ ვაშაძემ ეგზიტპოლების გამქვეყნების შემდეგ გამართულ ბრიფინგზე.

„აუცილებალდ დაველოდებით საბოლოო შედეგებს იმიტომ, რომ ამომრჩევლის უზარმაზარი რაოდენობა მივიდა არჩევნებზე 5 საათის შემდეგ. ასეთი არჩევნები, ბრჭყალებში, საქართველოში ჯერ არ ჩატარებულა. ყველა, ვისი მობილიზაციაც ხელისუფლებას შეეძლო, ყველას მობილიზაცია მოხდა - მოხდა ყველას მოსყიდვა, ყველა კრიმინალი, ყველა კორუფციონერი, ნარკომანი, ყველა საქმეში იყო ჩართული. მიუხედავად ამისა, დღეს 5 საათის მდგომარეობით 756 ათასი ხმა მიიღო გაერთიანებულმა ოპოზიციამ და მინდა გითხრათ, რომ ჩვენ ორ შედეგს მივაღწიეთ უკვე, როგორც არ უნდა დამთავრდეს ეს არჩევნები. პირველი არის ის, რომ გაერთიანებული ოპოზიცია შესდგა. ეს არის მძლავრი ძალა, დაშლას არ ვაპირებთ და მეორე, ამ არჩევნებით, ე.წ. ხელისუფლებამ და ე.წ. ქურდულმა ოცნებამ დაკარგა ლეგიტიმაციის ბოლო ნიშანი. აბსოლუტურად მნიშვნელობა არ აქვს რა უსულო საგანს შეიტანენ ისინი პრეზიდენტის სასახლეში. ამ ხელისუფლების საქმე დამთავრებული არის. იმიტომ, რომ ამისთანა სირცხვილი, რაც შეეხეება დემოკრატიულ არჩევნებს, საქართველოს არ უნახავს. დაველოდოთ საბოლოო შედეგებს და მორიგ განცხადებას გავაკეთებთ“, განაცხადა გრიგოლ ვაშაძემ საგანგებო ბრიფინგზე.

„ედისონ რისერჩის“ ეგზიტპოლის თანახმად, 17 საათის მონაცემებით, საპრეზიდენტო არჩევნების მეორე ტურში „ერთიანი ნაციონალური მოძრაობის“ და კიდევ სხვა 10 პოლიტიკური პარტიის გაერთიანება „ძალა ერთობაშია“-ს საპრეზიდენტო კანდიდატმა გრიგოლ ვაშაძემ 45%, ხოლო დამოუკიდებელმა და „ქართული ოცნების“ მხარდაჭერილმა კანდიდატმა სალომე ზურაბიშვილმა 55% მიიღო.

საქართველოს მთელ ტერიტორიაზე საარჩევნო უბნები უკვე დაიხურა. ცენტრალური საარჩევნო კომისია არჩევნების პირველად ოფიციალურ მონაცემებს უახლოეს საათებში გამოაქვეყნებს.