„ერთიანი ნაციონალური მოძრაობის" პოლიტიკური საბჭოს თავმჯდომარე ნიკა მელია მიხეილ სააკაშვილის განცხადებაზე, რომლის მიხედვითაც, ოპოზიციამ საპროტესტო აქციები უნდა დაიწყოს, აცხადებს, რომ ყველაფერს გაერთიანებული ოპოზიცია მესამე პრეზიდენტთან ერთად გადაწყვეტს.

„ყველაფერს გაერთიანებული ოპოზიცია გადაწყვეტს ერთობლივად, კონსესუსის საფუძველზე. მიხეილ სააკაშვილი ერთ-ერთია. ჩვენ გაერთიანებულ ოპოზიციაზე უბრალოდ კი არ ვსაუბრობდით, რომ ეს გაერთიანებული ოპოზიციაა. გაერთიანებული ოპოზიცია მოვითათბირებთ, გაერთიანებულ ოპოზიციაში ძალიან ბევრი სუბიექტია გაერთიანებული. ამიტომ, ჩვენ ვალდებული ვართ, რაც უნდა ცალკე აღებული ერთი პარტია დიდი მხარდაჭერით სარგებლობდეს – რეიტინგს ვგულისხმობ, სხვა პარტიაზე, ეს არავის გვაძლევს იმის შესაძლებლობას და უფლებას, რომ განცხადება შეუთანხმებლად გავაკეთოთ. უნდა მოვითათბიროთ და განცხადება ამის შემდეგ გავაკეთოთ. დარწმუნებული ვარ, ერთ აზრზე ჩამოვყალიბდებით და აქ ორი და სამი პოზიცია არ იქნება. ყველამ ერთად დავინახეთ, რა ხდებოდა და ხელისუფლება როგორ იქცეოდა. ეს კრიმინალური ხელისუფლებაა. თქვენ, „ქართული ოცნების“ გამარჯვება უფრო დაგაზარალებთ, ვიდრე დამარცხება.

ფაქტია, რომ ოპოზიცია ბრძოლას ყველა შემთხვევაში გააგრძელებს, ყველა ლეგიტიმური შესაძლებლობით. არასოდეს არ გავსულვართ კონსტიტუციური ფარგლებიდან, რას არ გვაბრალებდნენ, კონსტიტუციის ფარგლებს გასცდნენ და ასე შემდეგ და არც ახლა არ გავცდებით. მაგრამ იმ გადაწყვეტილებას მივიღებთ, რომელიც სახელმწიფო ინტერესებთან სრულ შესაბამისობაში იქნება", განაცხადა ნიკა მელიამ ჟურნალისტებთან საუბრისას.

სააკაშვილი საქართველოში ჩამოსვლას აანონსებს და მოუწოდებს საზოგადოებას არ აღიაროს საპრეზიდენტო არჩევნების შედეგები ლეგიტიმურად.