„სალომე ზურაბიშვილი -60 %, გრიგოლ ვაშაძე - 40% - ეს არის პრაქტიკულად ოლქიდან მიღებული ბოლო მონაცმეები, რომელსაც გვაწვდიან ჩვენი წარმომადგენლები შესაბამისი საარჩევნო უბნებიდან“, განაცხადა „ქართული ოცნება-დემოკრატიული საქართველოს“ აღმასრულებელმა მდივანმა ირაკლი კობახიძემ პარტიის ცენტრალურ ოფისში გამართულ ბრიფინგზე.

მისი თქმით, უკვე დათვლილია დაახლოებით 1 650 000 ხმა, დასათვლელი დარჩა, დაახლოებით, 300 000 ხმა.

„ძირითადი მონაცემები უკვე შეჯამებულია, შესაბამისად, არ ველოდებით პროცენტების არსებითად ცვლილებას. ასევე მინდა აღვნიშნო, რომ თბილისში გვაქვს 61% მაჩვებელი, თითქმის უკვე დასრულებულია უბნების დათვლა და არსებული მონაცმებით, სალომე ზურაბიშვილი იგებს არჩევნებს უკლებლივ ყველა ოლქში", თქვა კობახიძემ.

რაც შეეხება რაოდენობებს, ირაკლი კობახიძის თქმით, „ნაციონალური მოძრაობის" წარმომადგენლების მხრიდან არაერთგზის გაჟღერდა, თითქოს 900 000 ხმა აიღო გრიგოლ ვაშაძემ, რაც არასწორია, მისი მაჩვენებელი ბევრად ჩამორჩება 900 000 ხმას.

„ნაციონალური მოძრაობის" წევრები აქაც კი იტყუებიან. ეს არის საერთო სურათი, რომელიც არის წარმოდგენილი ამჟამინდელი მდგომარეობით. ეს მაჩვენებლები პრაქტიკულად აღარ შეიცვლება“, განაცხადა ირაკლი კობახიძემ.