რუსთაველის გამზირზე, გაერთიანებული ოპოზიციის მიერ დაგეგმილ აქციაზე შეკრებილ მოსახლეობას სიტყვით „ნაციონალური მოძრაობის“ პოლიტიკური საბჭოს თავმჯდომარემ, ნიკა მელიამ მიმართა. 

მელია ამბობს, რომ თბილისის ცენტრში ძალადობის გასაპროტესტებლად შეიკრიბნენ. მელიამ არჩევნებზე მოსახლეობის მოსყიდვისა და დაშინების ფაქტები გაიხსენა. მათ შორის ზეწოლა სოციალურად დაუცველ მოსახლეობასა და პენსიონრებზე. ასევე ისაუბრა დასაქმებულ მოქალაქეებზე მუქარის შესახებ.

„ჩვენ გვაქვს ორი არჩევანი, ან შევეგუოთ იმას, რაც ჩაიდინა ხელისუფლებამ, ან ვიბრძოლოთ გამარჯვებამდე. ხელისუფლებამ დანიშნა მესამე ტური და მას ეგონა, რომ ჩვენ ენერგიისგან დავიცლებოდით და მონაწილეობას არ და ვერ მივიღებდით მესამე ტურში. ჩვენ, არა თუ ვიღებთ მონაწილეობას მესამე ტურში, არამედ აუცილებლად გავიმარჯვებთ, იცით რატომ ხალხნო? ის რაც მათ იკადრეს, ყველა არჩევნები, რაც კი დამოუკიდებელი საქართველოს და ქვეყნის პირობებში ჩატარებულა, ერთად რომ შევაჯამოთ და ხარვეზები და დანაშაულებები რომ ავიღოთ, ათჯერ მეტი გააკეთეს ერთ არჩევნებში ხალხო.

ეს არ არის ნებაყოფლობით არჩეული პრეზიდენტი ხალხნო. ამ ყველაფერს თან აკეთებდნენ კრიმინალების მეშვეობით. სინამდვილეში, არც კრიმინალები არიან და არც ძველი ბიჭები, ესენი არიან სუს-თან და პოლიციასთან შეკრულები. პოლიციის უფროსი და თვითონ ძველი ბიჭი, პოლიციის უფროსი და თვითონ კრიმინალი, ერთად ატარებდა არჩევნებს. ჩვენ გვაქვს გამოსავალი. ან მივდივართ სახლებში და ფარ-ხმალს ვყრით, ან ვიბრძვით ბოლომდე. არ არის სალომე ზურაბიშვილი ჩვენი პრეზიდენტი“,  განაცხადა ნიკა მელიამ.