გაერთიანებულ ოპოზიციაში აცხადებენ, რომ „ძალა ერთობაშიას" შეთავაზებები მმართველი პარტიის მიმართ კონსტრუქციულია.

გიორგი ვაშაძემ ცოტა ხნის წინ გამართულ ბრიფინგზე ხელისუფლებას მოუწოდა, გადადგას „ასეთივე კონსტრუქციული ნაბიჯები".

ვაშაძემ გაერთიანებული ოპოზიციის შეთავაზებები და მოთხოვნები კიდევ ერთხელ გაიმეორა და ხელისუფლებას დისკუსიის დაწყებამდე დათქმული ვადა შეახსენა. 

„ჩვენ ვამზადებთ სასამართლოში სარჩელს იმისთვის, რომ გაუქმდეს საპრეზიდენტო არჩვნები, რადგან ეს იყო ნების გამოხატვაზე ტოტალური ზეგავლენის ნათელი მაგალითი.

ჩვენ ვითხოვთ რიგგარეშე საპარლამენტო არჩევნების ჩატარებას, რადგან ვფიქრობთ, რომ სრულიად განსხვავებული არის გარემო ე.წ. არჩევნების ჩატარების შემდეგ. აქვე დავაზუსტებ, რომ ვითხოვთ რიგგარეშე პროპორციული არჩევნების ჩატარებას, რისთვისაც ვფიქრობთ, რომ უნდა დაიწყოს მოლაპარაკებები შესაბამისი საპარლამენტო ცვლილებების განხორციელებასთან დაკავშირებით. გვიხარია, რომ ამ მოთხოვნას იზიარებს სრულიად ოპოზიციური პოლიტიკური სპექტრი.

უნდა შეიცვალოს საარჩევნო გარემო თავიდან ბოლომდე.

გვაქვს ისეთი შეთავაზება, როგორიც არის საარჩევნო ადმინისტრაციის სრული რეორგანიზება.

საჯარო მოხელეებთან დაკავშირებით კონკრეტული ამკრძალავი ნორმების ჩადება კანონში, რომ არ იყოს ისე, რომ საჯარო მოხელესა და პარტმუშაკს შორის სხვაობა არ იყოს.

პოლიტიკური პოლიციის ანუ სუს-ის გაუქმება....

ჩვენ ვართ აბსოლუტურად კონსტრუქციულები ამ შემოთავაზებებში. მივმართავ „ქართულ ოცნებას" - ასეთივე კონსტრუქციულ ნაბიჯებს ველით თქვენგან", განაცხადა გიორგი ვაშაძემ ბრიფინგზე.