კოალიცია „ქართული ოცნების“ ყოფილი წევრი გუბაზ სანიკიძე აცხადებს, რომ სალომე ზურაბიშვილი, მიუხედავად იმისა, რომ „ძალიან საეჭვო არჩევნებში მოიგო“, მაინც „ფაქტორია დღეს“ და ის რომ „პრეზიდენტად არ ვაღიაროთ, დავამხოთ და რევოლუცია მოვაწყოთ, ამას მოყვება უვიზო რეჟიმის გაუქმება, მთელი ამბები, გადაგვისვრიან უკან. ამიტომ, ეს არის ფაქტორი, სალომესთვის უნდა დავტოვოთ ღია ოპოზიციური კარიბჭე“.

აღნიშნულის შესახებ გუბაზ სანიკიძემ „ TV პირველის“ გადაცემა „რეაქციაში“ ისაუბრა და დასძინა, რომ ქვეყანაში მოვლენების რევოლუციური სცენარით განვითარებას არ ემხრობა, თუმცა გამაფრთხილებლად განაცხადა, რომ „სომხეთის ამბავი გვიახლოვდება, ფაშინიანის ამბავი გვიახლოვდება“, რადგან მისი აზრით, „ფაშინიანს თავად ეპოქა ქმნის, ვითარება ქმნის გმირს, პიროვნებას“.

სანიკიძე საქართველოში რევოლუციურ სცენარს იმ შემთხვევაში არ გამორიცხავს, თუკი ხელისუფლება ცვლილებებს არ განახორციელებს და საარჩევნო გარემოს არ შეცვლის. მისი თქმით, „მრგვალმა მაგიდამ“ გააკეთა თავის დროზე ის, რაც ახლა უნდა გაკეთდეს.

„მრგვალმა მაგიდამ იმუშავა საარჩევნო გარემოზე, საარჩევნო გარემოთი მიაწვა კომუნისტურ ხელისუფლებას, უკეთეს პირობებში დაანიშნინა არჩევნები და დაამარცხა...

„ხელისუფლებას მივმართავ. ჩემო ძვირფასებო, ბევრი ჩემი მეგობარი ხართ, ქვეყანა აქეთ არ წაიყვანოთ, თორემ პარიზს შეხედეთ, ყვითელჟილეტიანები ხელისუფლებას რას უშვებიან და ხელისუფლება როგორ იქცევა, დღეს საფრანგეთის პრემიერ მინისტრი გამოვიდა და გამოაცხადა, რომ უნდა დავუთმოთ ამ ხალხსო. არ ხართ იმპერატორები, არ ხართ მაგრები, ძალიან სუსტად ხართ. მე რევოლუციის არ მეშინია, დასჭირდება ამ ქვეყანას რევოლუცია, მოხდება რევოლუცია. თუ არაფერს შეცვლით, თუ საარჩევნო გარემოს არ შეცვლით, თუ არჩევნები არ ჩატარდება აქ ნორმალურად, საქართველო მიიღებს რევოლუციას და მე კი არ ვარ ამის გარანტორი, ხალხია ამის გარანტორი“, განაცხადა გუბაზ სანიკიძემ, რომლის სიტყვების ციტირებასაც „საზოგადოებრივი მაუწყებელი“ ავრცელებს.