სალომე ზურაბიშვილი ვარაუდობს, რომ 16 დეკემბერს საქართველოს პრეზიდენტის ინაუგურაციაზე თელავში ბევრი სტუმარი იქნება და აქვს „დიდი მოლოდინი, რომ [ინაუგურაცია] კარგად ჩაივლის და ეს იქნება ყველასთვის დასამახსოვრებელი დღე, რომელიც დარჩება ისტორიაში, როგორც პირველი ქალი პრეზიდენტის ინაუგურაცია“.

„ვფიქრობ, ინაუგურაციაზე საკმაოდ ბევრი სტუმარი იქნება, პროტოკოლით გათვალისწინებული სტუმრები, ჩვენი საგარეო უწყების პროტოკოლი გზავნის მოსაწვევებს ყველა იმ ქვეყნის პირველ პირთან, რომლებიც არიან ჩვენი პარტნიორები ან აკრედიტებული. თუმცა, ეს არ ნიშნავს, რომ ყველა ჩამოვა, ამისთვის ძალიან მცირე დროა, მაგრამ იმედი მაქვს, თუნდაც ქალთა წარმომადგენლობა იქნება შესატყვისი იმ ფაქტის, რომ საქართველოში პირველად აირჩიეს ქალი პრეზიდენტი“, განაცხადა სალომე ზურაბიშვილმა დაამატა, რომ ოფიციალური სტუმრების გარდა მას პირადი სტუმრებიც ეყოლება.

„მეც მეყოლება ჩემი პირადი სტუმრები, იმ კონტაქტებით, რაც უცხოეთში მაქვს. ვფიქრობ, სასურველია, მათაც გავაცნოთ საქართველო და ამითაც გამოვიყენო ეს ღონისძიება, რომ გაიცნონ საქართველო, თელავი და კახეთი“, აღნიშნა ზურაბიშვილმა.

მან ხაზი გაუსვა, რომ ინაუგურაციის ადგილად თელავის არჩევა იმის დასტურია, რომ იგი ყველას პრეზიდენტია.

„თელავმა ნაკლები ხმა მომცა და ამ ადგილის არჩევა იმის დასტურია, რომ მე ვარ ყველას პრეზიდენტი. არ ვარ გაბუტული, რომ არ მომცეს ხმა. ვთვლი, რომ ინაუგურაციის ცერემონიის გამართვა რეგიონში არის ძალიან სწორი. ყველაფერის თბილისში ჩატარება არ არის სწორი. ეს არის გზავნილი არა მხოლოდ თელავის ამომრჩევლისათვის, არამედ გზავნილია მთელი საზოგადოებისთვის - ვინც არ მომცა ხმა, თავი შეიკავა ან თუნდაც სხვა კანდიდატებს მისცა ხმა. მე ვიქნები ყველას პრეზიდენტი და მზად ვარ ამისთვის“, განაცხადა სალომე ზურაბიშვილმა.