საქართველოს ყოფილი პრეზიდენტი მიხეილ სააკაშვილი „არჩევნების მოპარვის“ შემდეგ შექმნილ პოლიტიკურ სიტუაციაზე „ფეისბუქის" მეშვეობით ორშაბათს პირდაპირ ეთერში გამოსვლას გეგმავს, თუმცა ჯერჯერობით დეტალებს არ აკონკრეტებს.

„ორშაბათს, თბილისის დროით 20 საათზე მექნება ფბ „ლაივი“ არჩევნების მოპარვის შემდეგ შექმნილ პოლიტიკურ სიტუაციაზე“, წერს სააკაშვილი „ფეისბუქზე“.

სააკაშვილი პირველ კომენტარს გააკეთებს მას შემდეგ, რაც „ნაციონალური მოძრაობის“ და სხვა ოპოზიციური პარტიების მიერ 16 დეკემბერს დაგეგმილი საპროტესტო აქციის თაობაზე თავისი მკვეთრად უარყოფითი დამოკიდებულება გამოხატა „ნაციონალური მოძრაობის“ ერთ-ერთმა ლიდერმა, სალომე სამადაშვილმა და განაცხადა, რომ „სალომე ზურაბიშვილის არალეგიტიმურობის გზავნილი და გრიგოლ ვაშაძის გამოცხადება საქართველოს პრეზიდენტად, არ აკმაყოფილებს“ დასავლურ კრიტერიუმებს და სიტუაციის ჩიხში შეყვანას ემსახურება.