მთავრობასა და პარტია „ქართულ ოცნებაში“ მოსალოდნელ საკადრო ცვლილებებს ადასტურებს პარლამენტის იურიდიული კომიტეტის თავმჯდომარე ეკა ბესელია, რომელიც აცხადებს, რომ ანალიზის გაკეთების შემდეგ ეს ახალი ეტაპი „რაც შეიძლება მალე“ უნდა დადგეს. თუმცა იგი კონკრეტული გვარების დასახელებისაგან თავს იკავებს.

„ის დიდი ცვლილებები, კომპლექსური ცვლილებები, რომელზედაც ბიძინა ივანიშვილი საუბრობდა, რა თქმა უნდა, ძალაშია და ამ თემაზე გაცილებით უფრო ფართო და ხანგრძლივი სამუშაო პროცესი იქნება. ჩვენი ცვლილებების თაობაზე საუბარი არ ეხება მხოლოდ კონკრეტულ გვარებს და ამ ჭრილში არ განვიხილავთ იმ ახალ, ასე ვთქვათ ეტაპს... პროცესი უნდა განვიხილოთ კომპლექსურად, იმიტომ, რომ ამ არჩევნების შედეგებს სჭირდება უდავოდ კარგი ანალიზი. ის, რომ არაფერი არ მოხდება, ნამდვილად ასე არ არის. კარგი ანალიზი ნიშნავს იმას, რომ ყველა დონეზე, ყველა რგოლის მუშაობის ხარისხი უნდა შეფასდეს და აუცილებელია სწორი ანალიზის შედეგად გარკვეული სიახლეების შეთავაზება. მე ვფიქრობ, რომ ეს ეტაპი უნდა დადგეს რაც შეიძლება მალე“, განაცხადა ბესელიამ.

მედიის ინფორმაციით კი პრემიერ მინისტრის პოსტზე მამუკა ბახტაძე შეიძლება შინაგან საქმეთა მინისტრმა, გიორგი გახარიამ შეცვალოს. ასევე საუბარია რამდენიმე გუბერნატორის, კერძოდ, კახეთის და ქვემო ქართლის სახელმწიფო რწმუნებულების, ირაკლი ქადაგიშვილის და შოთა რეხვიაშვილის შეცვლაზე, რადგან „ქართული ოცნების“ მხარდაჭერილმა დამოუკიდებელმა საპრეზიდენტო კანდიდატმა, სალომე ზურაბიშვილმა თელავში და რუსთავში არჩევნების ორივე ტური წააგო.

მედია „ქართულ ოცნებაში“ მოსალოდნელ საკადრო ცვლილებებზეც წერს. მედიის ცნობით, მმართველი პარტიის გენერალური მდივნის თანამდებობას დატოვებს კახა კალაძე, ასევე აღმასრულებელი მდივნის პოსტს დაემშვიდობება ირაკლი კობახიძე.

პარლამენტის თავმჯდომარე საკადრო ცვლილებებთან დაკავშირებით გავრცელებულ ინფორმაციაზე კომენტარის გაკეთებისას ამბობს, რომ არც მთავრობის, არც პარტიის, არც პარლამენტის მიმართულებით ეს საკითხები არ განიხილება.