თელავის მუნიციპალიტეტის მერიის უარის მიუხედავად, გაერთიანებული ოპოზიცია 16 დეკემბერს, თელავის ცენტრში აქციას მაინც გამართავს.

განცხადება აღნიშნულის თაობაზე „ერთიანი ნაციონალური მოძრაობის” პოლიტიკური საბჭოს წევრმა, თელავის რაიონული ორგანიზაციის თავმჯდომარემ, გიორგი ბოტკოველმა გააკეთა.

„გუშინ მერის წერილი მივიღეთ ყოვლად გაუგებარი, ყოვლად არაარგუმენტირებული და საუბრობს რაღაც თემებზე, რომელიც, პირველ რიგში, მისი საქმე არ არის და რაღაც დაცვის თემებზე საუბრობს, რომ ეს ტერიტორია სჭირდებათ ინაუგურაციის ტერიტორიის დასაცავად. ამიტომ, მინდა ვუთხრა მერიას, რომ ჩვენ ვაპირებთ ზუსტად იქ, ერეკლე მეორის ძეგლსა და 800-ს წლოვან ჭადარს შორის არსებულ მოედანზე მშვიდობიან საპროტესტო მანიფესტაციას. ამიტომ, პირიქით, თხოვნა და მოწოდება გვაქვს მათ მიმართაც, პოლიციის მიმართაც და ყველა იმ სტრუქტურის მიმართ, რომელიც ვალდებულია, დაიცვას ჩვენი უსაფრთხოება, რომ ჩვენ იქ ვაპირებთ მშვიდობიან აქციას, კეთილი ინებონ, დაიცვან მშვიდობიანი მოქალაქეები, რომლებიც გამოხატავენ პროტესტს, რომელიც იქნება სრული ცივილიზებული ფორმით", განაცხადა გიორგი ბოტკოველმა.

გაერთიანებულმა ოპოზიციამ მშვიდობიანი აქციის ჩატარებისთვის ტერიტორიის გამოყოფის მიზნით, თელავის მერიას ორი დღის წინ მიმართა. მერიამ რუსთაველის ქუჩაზე დაანონსებული აქციისთვის ოპოზიციას ალტერნატიული ტერიტორია - 9 აპრილის ქუჩა შესთავაზა.

16 დეკემბერს, თელავში ერეკელე მეფის სასახლეში საქართველოს მეხუთე პრეზიდენტის ინაუგურაცია იმართება.