„ამ ქვეყანაში ვცხოვრობთ ბატონებო და კეთილი იყოს თქვენი მობრძანება ბიძინა ივანიშვილის და პუტინის საქართველოში“, განაცხადა გაერთიანებული ოპოზიციის, „ძალა ერთობაშია“-ს ყოფილმა საპრეზიდენტო კანდიდატმა, გრიგოლ ვაშაძემ თელავში კვირას გადაადგილებისას პოლიციის მხრიდან მათთვის ველისციხეში შექმნილი მდგომარეობის შეფასებისას.

საგანგებო ბრიფინგზე, სადაც ვაშაძემ გაერთიანებული ოპოზიციის მოთხოვნები წამოაყენა, მოიშველია სახალხო დამცველის, ნინო ლომჯარიას განცხადება, რომელმაც მისი თქმით, „მოუწოდა შინაგან საქმეთა სამინისტროს რომ უზრუნველეყოთ მომიტინგეთა შესაძლებლობა გადაადგილებულიყვნენ თავისუფლად თელავის მიმართულებით. მან [ლომჯარიამ] ხაზი გაუსვა იმას, რომ აღნიშნული წარმოადგენდა მათ კონსტიტუციურ უფლებას, რომელიც არ შეიძლება შეიზღუდოს კანონით გაუთვალისწინებელი მიზნებით.

„მე მედგა იქ ვიღაცა ფორმაში ჩაცმული, ახლა არ მინდა უხეში სიტყვები ვიხმარო, რომელიც მიყვებოდა, რომ თურმე უსაფრთხოების ზონა არის. თელავიდან, სადაც ბიძინა ივანიშვილს ვიღაცა უნდა ეკურთხა რაღაცა პოსტზე, იქიდან 30 კილომეტრის ფარგლებში უსაფრთხოების ზონა იყო. თქვენ წარმოგიდგენიათ ევროპული ქვეყანა, სადაც პროტესტისთვის მიმავალ მოქალაქეებს „შოსე“ გადაუკეტონ?! აი, საფრანგეთში, სადაც „ყვითელ ჟილეტებს“ გადაუკეტავენ „შოსეს“? ამ ქვეყანაში ვცხოვრობთ ბატონებო და კეთილი იყოს თქვენი მობრძანება ბიძინა ივანიშვილის და პუტინის საქართველოში“, განაცხადა გრიგოლ ვაშაძემ.