მმართველი პარტიაში გაერთიანებული ოპოზიციის მიერ პერმანენტული აქციების დაანონსებას ეხმაურებიან.

საპარლამენტო უმრავლესობის წევრი გიორგი ვოლსკი მიიჩნევს, რომ ოპოზიციას დესტაბილიზაციის მოსახდენად, რესურსი არ გააჩნია.

„განაცხადი იმის თაობაზე, რომ პერმანენტული აქციები იქნება იმის თაობაზე, რომ სტაბილურობას შეექმნება პრობლემები და იმის თაობაზე, რომ ქვეყანაში შეიქმნება არანორმალური სიტუაცია, ეს მუქარაც, რასაკვირველია, ერთ-ერთი მთავარი ამოცანაა „ნაციონალური მოძრაობის“, რომლის გარშემო ერთკაციანი რამდენიმე პარტიაც არის შეკრებილი, თითქოს, მრავალრიცხოვანი პარტიები ჯგუფი მოითხოვს ამას. მე არ ვფიქრობ, რომ ეს აგრესიული რესურსი საკმარისია იმისთვის, რათა ქვეყანაში დესტაბილიზაცია მოახდინოს", უთხრა ვოლსკიმ „რუსთავი 2"-ს.

გიორგი ვოლსკი ასევე გამოეხმურა ველისციხესთან მომხდარ ინიციდენტს და განაცხადა, რომ გაერთიანებული ოპოზიციის გუშინდელი ნაბიჯი ანტისახელმწიფოებრივი იყო.

„ყველაფერი, რაც დაიგეგმა და განხორციელდა, იყო ანტისახელმწიფოებრივი. შესაძლოა, მე ვუშვებ, რომ იქ რაღაც შეფერხება არსებობდა გადაადგილებაში, მაგრამ რასაკვირველია, რეაქცია ამ შეფერხებაზე გაცილებით უფრო აგრესიული იყო, ვიდრე ეს შეიძლება ყოფილიყო", განაცხადა ვოლსკიმ.