„ბანკები ჩვენ გვეხება“ - ამ სლოგანით  არასამთავრობო ორგანიზაცია “პოზიციის” ინიციატივით, სექტემბერში მაღალი საბანკო პროცენტების წინააღმდეგ ფართომასშტაბიანი აქცია „ბანკები ჩვენ გვეხება“ - გაიმართება.


„პოზიცია“, „ახალგაზრდა ადვოკატებთან“ და „ახალგაზრდა ფინანსისტთა და ბიზნესმენთა ასოციაციასთან“ ერთად კოალიციურ რეჟიმში წამოიწყებს მოძრაობას, რომელში ჩართვაც ყველა იმ მოქალაქეს შეეძლება, ვინც თვლის, რომ საქართველოში ბანკები მომხმარებლებს არაკეთილსინდისიერად ექცევიან და მათზე სესხების გაცემას კაბალურ პირობებში აწარმოებენ.

კოალიცია თვლის, რომ, არა მხოლოდ სამომხმარებლო სესხების პროცენტია მაღალი და სრულიად არაადეკვატური, არამედ მისი ამოღების მექანიზმიც. „პოზიციის“ აღმასრულებელი დირექტორი გურამ ადამაშვილი აცხადებს, რომ ე.წ. პრობლემური სესხის განყოფილებათა წარმომადგენლები ვალების გადახდისუუნარო მოქალაქეებზე ახორციელებენ შანტაჟს და მუქარას, აყენებენ მათ შეურაცხყოფას და პრობლემის ერთობლივად გადაწყვეტის გზების ძიების ნაცვლად, მოქალაქეთა გარკვეული ნაწილი თვითმკვლელობის მდგომარეობამდეც კი მიჰყავთ.


ადამაშვილს მიაჩნია, რომ ისეთ ეკონომიკურ პირობებში, როგორშიც დღეს საქართველო იმყოფება, საბანკო სექტორი ყველაზე მომგებიან ბიზნესად რჩება და ეს ძირითადად მათი მოქალაქეებისადმი მძარცველური პოლიტიკის გატარების შედეგია.


„ბანკები საქართველოში ყველაფრიდან ფულს აკეთებენ, დაწყებული ანგარიშის გახსნით, პლასტიკური ბარათის დამზადებით და საკუთარი ფულის ანგარიშიდან გამოტანითაც კი. რას ვგულისხმობ? ყველამ, ვინც საბანკო სფეროს მომხმარებელია, იცის, რომ ბანკი არც ისე მცირე საფასურს ართმევს მომხმარებელს პლასტიკური ბარათის დამზადებისა თუ დაკარგული ან დაზიანებული ბარათის აღდგენისათვის, გარკვეულ პროცენტს უკავებს საბანკო ტერმინალიდან თუ თავად ბანკის ოფისიდან თანხის გამოტანისას, ელემენტარული ცნობის აღებისთვისაც კი საფასურს ახდევინებს და ა.შ. მაშინ როცა დასავლეთში, და მაგალითად დიდ ბრიტანეთს მოვიყვან, ყველა ეს მომსახურება უფასოა. უფრო მეტიც, იმ შემთხვევაშიც კი არაფერს იხდის მოქალაქე საბანკო ტერმინალიდან ფულის გამოტანისას, როცა ის სხვა ბანკის პლასტიკური ბარათით სარგებლობს. ასევე უფასოა დიდი ბრიტანეთის ბანკების უმრავლეობაში ერთი ბანკიდან მეორეში თანხის გადარიცხვა. აქ კი რა ხდება? კომერციული ბანკები ყველაფერში ფულს აკეთებენ, პირდაპირ ვიტყვი, რომ ძარცვავენ ხალხს და საერთოდ არ ფიქრობენ მათივე ქვეყნის მოქალაქეების ბედზე“, - აცხადებს გურამ ადამაშვილი.


კოალიციას, მიაჩნია,  რომ იმ პირობებში, როცა ქვეყანაში უმუშევრობის დონე მაღალია, ლარმა დევალვაცია განიცადა და ზოგადად, რეგიონში საკმაოდ მყიფე ეკონომიკური მდგომარეობაა, ბანკებმა იმის ნაცვლად, რომ რაიმე ფორმით სოლიდარობა გამოხატონ თავიანთი ქვეყნის მოქალაქეებისადმი, პირიქით, მათ მიმართ არავითარ რეალურ შეღავათს არ აწესებენ. „პოზიციაში“ მიაჩნიათ, რომ კომერციული ბანკების ამგვარი დამოკიდებულება მოსახლეობის მიმართ ასევე ზიანს აყენებს საქართველოში ოჯახის ინსტიტუტის გაძლიერებასა და განვითარებას, რადგან ახალდაქორწინებულ წყვილებს არ აქვთ სესხების აღებისა და საკუთარი ბინების განვადებით შეძენის საშუალება, რაც ცოლ-ქმრის ურთიერთობას გარკვეულ პრობლემებს უქმნის.


ბევრი ადამიანი კი, გამომდინარე იქედან, რომ ბინების გაყიდვა მოუწიათ, პირდაპირი მნიშვნელობით, ქუჩაშია დარჩენილი. მასობრივ პრობლემად იქცა ოჯახის მატერიალურად უზრუნველყოფის საკითხი, რამაც, უკვე დადასტურებული სტატისტიკით, ამავე ოჯახების ნგრევა გამოიწვია და კიდევ სხვა, მათ შორის, მორალური პირობების გათვალისწინებით, ერთადერთ გამოსავალს თვითმკვლელობაში ხედავენ. არასამთავრობო ორგანიზაციები თვლიან, რომ საჭიროა, აღნიშნული პრობლემის კომპლექსურ კვლევასთან ერთად, ქმედითი ნაბიჯების გადადგმა. მთავრობა, კანონში არსებული რეგულაციების გათვალისწინებით, ვერ აიძულებს საბანკო სექტორის ხელმძღვანელობას, შეამცირონ კატასტროფულად (სრულიად ხელოვნურად) გაზრდილი საპროცენტო განაკვეთები კრედიტებზე. ამ ფონზე კი, „პოზიცია“-ს მიაჩნია, რომ აღნიშნული პრობლემის გადასაჭრელად ხსნა მხოლოდ მასობრივი საზოგადოებრივი მოძრაობის წამოწყებაშია.


„პოზიცია“, ყველა იმ მოქალაქეს, ვინც თვლის, რომ ბანკები უსამართლოდ მოექცნენ, მოუწოდებს დარეგისტრირდნენ არასამთავრობო ორგანიზაციის ოფიციალურ ვებგვერდზე www.position.ge და ერთად ჩაერთონ სექტემბერში დაგეგმილ ფართომასშტაბიან აქციაში.