საქართველოს პრემიერ მინისტრი მამუკა ბახტაძე „ფეისბუქის“ პირდაპირ ეთერში გურჯაანის მუნციპალიტეტის სოფელ ველისციხესთან კვირას განვითარებულ მოვლენებს გამოეხმაურა და განაცხადა, რომ „უპასუხისმგებლო და დესტრუქციული ძალის მიერ ჩადენილი მოქმედებები ვერანაირ კრიტიკას ვერ უძლებს“ და „ნაციონალური მოძრაობა“ „არ იშლის ტრადიციებს, განაგრძობს ძალადობას და საზოგადოებაში ისეთი განწყობის შექმნას, თითქოს საზოგადოებრივ ცხოვრებაში პრობლემებია“.

მან გამოჩენილი პროფესიონალიზმისა და მოთმინებისთვის სამართალდამცავებს განსაკუთრებულ მადლობა გადაუხადა. მან პროფესიული მოვალეობის მაღალ დონეზე შესრულებისთვის ასევე მადლობა უთხრა მედიის წარმომადგენლებს.

„ნებისმიერი ქვეყანა იამაყებდა ასეთ პოლიციით. ასევე განსაკუთრებული მადლობა მედიის წარმომადგენლებს, რომლებმაც ხელშეშლის მიუხედავად შეძლეს გუშინდელი დღის ობიექტურად გაშუქება. „ნაციონალური მოძრაობა“ არ იშლის ტრადიციებს, განაგრძობს ძალადობას და საზოგადოებაში ისეთი განწყობის შექმნას, თითქოს საზოგადოებრივ ცხოვრებაში პრობლემებია. ამის ილუზია ნურავის ექნება, ვერც ერთი ძალა და ვერანაირი ასეთი ქმედება საზოგადოებრივ ცხოვრებაში დისონანსს ვერ შემოიტანს. კამერებზე დაფიქსირებული იყო ძალიან ბევრი დარღვევა. ოპოზიციის ბევრი წარმომადგენელი გასცდა კანონის ჩარჩოებს და სრული პასუხისმგებლობით ვაცხადებ, ძალადობაში შემჩნეული ნებისმიერი პირი, იქნებოდა ეს პოლიციელების თუ მოქალაქეების მისამართით, კანონის წინაშე მთელი სიმკაცრით აგებს პასუხს. ჩვენ ვაშენებთ სამართლებრივ სახელმწიფოს, ყველას აქვს პროტესტის მშვიდობიანად გამოხატვის უფლება, მაგრამ ის, რაც ვიხილეთ, ვერანაირ კრიტიკას ვერ უძლებს. კიდევ ერთხელ მადლობა პოლიციელებს მოთმინებისთვის და მაღალი პროფესიონალიზმის ჩვენებისთვის“, განაცხადა პრემიერ მინისტრმა, რომლის სიტყვების ციტირებასაც „საზოგადოებრივი მაუწყებელი“ ავრცელებს.

მთავრობის მეთაურმა აღნიშნა, რომ სამართალდამცველებმა ასეთივე მაღალი პროფესიონალიზმი აჩვენეს, როგორც წინასაარჩევნო პერიოდში, ასევე საპრეზიდენტო არჩევნების ორივე ტურში კენჭისყრის დღეს და პროცესის მშვიდობიან რეჟიმში ჩატარება უზრუნველყვეს.