„საკმაოდ მძიმე საარჩევნო ფონი იყო. მე 2012 წლის შემდეგ ასეთი მძიმე საარჩევნო ფონი, ასეთი შეურაცხყოფები ნამდვილად არ მახსოვს. ე.ი როგორი მდგომარეობა იყო. აი, დუელში რომ მიდის ადამიანი. ჩვენ ვიყავით პისტოლეტით და ისინი იყვნენ ზარბაზნით“, განაცხადა „TV პირველის“ გადაცემა „რეაქციაში“ „ქართული ოცნება - დემოკრატიული საქართველოს“ გენერალურმა მდივანმა, თბილისის მერმა, კახა კალაძემ და გაიხსენა, თუ როგორ ცდილობდნენ „ნაციონალური მოძრაობის“ აქტივისტები პროვოკაციების მოწყობას და რეგიონებში სალომე ზურაბიშვილის საარჩევნო შეხვედრების ჩაშლას.

„მათი განცხადებები, მათი საარჩევნო კამპანია პირდაპირ საუბრობდა იმაზე, რომ ერთადერთი, რისთვისაც უნდოდათ პრეზიდენტის ინსტიტუტის გამოყენება, ეს იყო ქვეყანაში დესტაბილიზაციის მოწყობა, ეს იყო ქვეყანაში არეულობის მოწყობა და ადამიანების დაპირისპირების მოწყობა. ამასთან დაკავშირებით უამრავი განცხადება არსებობს მათი ლიდერების, რომელიც შეგვიძლია ამოვიღოთ. შესაბამისად, მეორე ტურში მათ მიერ შემოთავაზებული თამაშის წესებით დავიწყეთ ჩვენ სარჩევნო კამპანიები და იმიტომ არიან გაბოროტებული, რომ მათ მიერ შემოთავაზებული თამაშის წესებით წააგეს ეს არჩევნები და ჩვენი ქვეყნის მოსახლეობის უმრავლესობამ უთხრა არა ძალადობას, უთხრა არა სიძულვილის ენით საუბარს, უთხრა არა ბოროტებას და უთხრა არა „ნაციონალურ მოძრაობას“, განაცხადა კახა კალაძემ.