„როდესაც 28 ნოემბერს მოპარა ქართველ ხალხს ბიძინა ივანიშვილმა არჩევანი და ძალით დანიშნა სალომე ზურაბიშვილი, ალბათ, ლოგიკური იყო, რომ ეს ინაუგურაცია გაბანძდა და არის გაბახებული ინაუგურაცია“, განაცხადა გაერთიანებული ოპოზიციის წევრმა, „ეროვნულ-დემოკრატიული პარტიის“ თავმჯდომარემ, ბაჩუკი ქარდავამ „რუსთავი 2“-ის ეთერში, გადაცემა „არჩევანში“ სტუმრობისას.

მისი თქმით, „კრიმინალმა გიორგი გახარიამ მისცა უკანონო ბრძანება“ პოლიციელებს კახეთში და „აიძულა ისინი, ჩაედინათ სისხლის სამართლის დანაშაული“.

„დამფრთხალი ხელისუფლების ნაბიჯმა, რაც გააკეთა პიკეტების სახით, ამან გამოიწვია, რა შედეგი მიიღო? გააბახა ინაუგურაცია და ეს კანონზომიერებაა. როდესაც 28 ნოემბერს მოპარა ქართველ ხალხს ბიძინა ივანიშვილმა არჩევანი და ძალით დანიშნა სალომე ზურაბიშვილი, ალბათ, ლოგიკური იყო, რომ ეს ინაუგურაცია, მაპატიეთ ამ სიტყვებისთვის, გაბანძდა და არის გაბახებული ინაუგურაცია იმიტომ, რომ ამის პარალელურად მიმდინარეობდა უმწვავესი სამოქალაქო პროტესტი, უმწვავესი სამოქალაქო პროტესტი, სადაც ერთ მხარეს იყო საზოგადოება და მეორე მხარეს იყო კანონდამრღვევი, ასე ვთქვათ, ე.წ. პოლიციის ფორმაში გამოწყობილი ადამიანები, რომლებსაც კონსტიტუციის ფარგლებს გარეთ გასულმა, კრიმინალმა გიორგი გახარიამ მისცა უკანონო ბრძანება და ისინი აიძულა ჩაედინათ სისხლის სამართლის დანაშაული. რაში მდგომარეობდა ეს დანაშაული? ჩვენი კონსტიტუციური უფლება, მივსულიყავით, დაგვეფიქსირებინა, რომ არჩევნები არის გაყალბებული... პროტესტი გამოგვეხატა და მშვიდობიანად დავშლილიყავით, ამის საშუალება არ მოგვცა და ჩახერგა გზები. ეს იყო კანონდარღვევა და ჩვენ სრული უფლება გვქონდა, მოქალაქეებს, ეს პიკეტები, რომელიც უკანონოდ იყო აღმართული და სხვათაშორის როცა არის საუბარი საიდენტიფიკაციო ნიშნებზე, რომელიც იყო იგივე იმ ავტობუსზე, რომელსაც ბრალად უყენებენ კირკიტაძეს და ან კიდევ, მე მაქვს ფოტოები გადაღებული, ეს გზები გადახერგილი გარკვეულ ნაწილებში იყო ტრაილერებით და სატვირთო ავტომანქანებით. მას არანაირი ნიშნები არ ჰქონდა პოლიციის. მერე მატარებელი მოაყენეს, რომ თუ გაუჭირდებოდათ ვთქვათ, რომ მატარებლით ჩაეხერგათ. ეს სამარცხვინო იყო. ეს იყო უდიდესი კანონდარღვევა“, განაცხადა ბაჩუკი ქარდავამ.