„მოვუწოდებ სამინისტროებს და სხვადასხვა უწყებებს, რომ არც ერთი ტყუილი არ გაუტარონ „რუსთავი 2“-ს. სიცრუეს და დეზინფორმაციას აუცილებლად სჭირდება რეაგირება და აუცილებლად სჭირდება პასუხი“, განაცხადა თბილისის მუნიციპალიტეტის მთავრობის სხდომაზე დედაქალაქის მერმა კახა კალაძემ, რომელმაც თბილისის მთავრობის წევრებს „ჟურნალისტური ეთიკის ქარტიის“ მიერ „რუსთავი 2“ -ის ჟურნალისტების მხრიდან მის მიმართ განზრახ დამახინჯებული ინფორმაციის გავრცელების დაგმობის შესახებ მიაწოდა ინფორმაცია. 

„რუსთავი 2“-ის ჟურნალისტების, თამარ ბაღაშვილისა და დიანა ჯოჯუას წინააღმდეგ ქარტიას დავით მახარაშვილმა მიმართა. ის მიიჩნევდა, რომ 2018 წლის 16 ნოემბერს საინფორმაციო გადაცემა „კურიერში“ კახა კალაძის ბრიფინგიდან ინფორმაცია არასწორად გაავრცელეს. 16 ნოემბერს წინასაარჩევნო პერიოდი იყო, საარჩევნო კამპანიის რეჟიმში ვიყავით და მე კონკრეტულ თემასთან დაკავშირებით გავაკეთე ბრიფინგი და განცხადება... ე.ი. ინფორმაცია არასწორად იყო გავრცელებული „რუსთავი 2“-ის ამ ჟურნალისტების მხრიდან. კერძოდ, ისე წარმოაჩინეს, რომ თბილისის მერი ქართველ სამხედროებს 2008 წლის ომში თანამებრძოლების ცხედრების მიტოვებაში ადანაშაულებდა. განმცხადებლის თქმით, მსგავსი რამ კახა კალძეს არ უთქვამს. ამის დასტურად კი ბრიფინგის სრული ვერსია აქვს წარმოდგენილი. „ქარტიის საბჭომ“ მსჯელობის შედეგად დაადგინა, როგორც სიზუსტის დარღვევა, ისე ფაქტის განზრახ დამახინჯება. აი, ეს არის ის, რაზეც მე ყოველ მთავრობის სხდომაზე მიწევს საუბარი. ეს არის პასუხი იმ სიცრუის, რასაც ჩვენ ყოველდღიურ რეჟიმში ვისმენთ მიზანმიმართულად. ხდება კონკრეტული ფაქტების დამახინჯება, არასწორი ინფორმაციის მიწოდება მოსახლეობისთვის, თუმცა ჩვენ არანაირ სიცრუეს არ ვაპატიებთ და არ გავუტარებთ... ამავდროულად, მინდა მოვუწოდო ყველა სახელმწიფო სტრუქტურას, ეს იქნება სამინისტროები, სხვადასხვა უწყებები, რომ არც ერთი ტყუილი არ გაუტარონ ტელეკომპანია „რუსთავი 2“-ს“, განაცხადა კახა კალაძემ.