„გადაწყვეტილება იქნა მიღებული იმის თაობაზე, რომ ყველა დეპუტატს მიეცეს გიორგი გახარიასთან კითხვების დასმის და პასუხების მიღების საშუალება და ამისთვის, ერთადერთი ფორმატია პარლამენტის პლენარული სხდომა“, უთხრა ჟურნალისტებს საქართველოს პარლამენტის თავმჯდომარემ.

ირაკლი კობახიძის თქმით, შინაგან საქმეთა მინისტრთან შეხვედრისა და მისი მოსმენის სურვილი რამდენიმე კომიტეტს ჰქონდა და აქედან გამომდინარე, ფორმატი, რომელიც დეპუტატების ინტერესებს საუკეთესოდ უპასუხებს, პლენარული სხდომაა.

„იყო რამდენიმე კომიტეტისგან იმის ინტერესი, რომ მომხდარიყო მოსმენა და შეხვედრა ბატონ გიორგი გახარიასთან და აქედან გამომდინარე, მე ვფიქრობ, სწორი გადაწყვეტილება იქნა მიღებული იმის თაობაზე, რომ ყველა დეპუტატს მიეცეს ბატონ გიორგი გახარიასთან კითხვების დასმის საშუალება და ამ კითხვებზე პასუხების მიღების საშუალება და ამისათვის, ერთადერთი ფორმატი არის, რა თქმა უნდა, პარლამენტის პლენარული სხდომა. აქედან გამომდინარე, მე ვფიქრობ, რომ ეს ფორმატი საუკეთესოდ პასუხობს ჩვენი დეპუტატების, კოლეგების ინტერესებს“, განაცხადა ირაკლი კობახიძე, როგორც ამას პარლამენტის პრესსამსახური იტყობინება.

შინაგან საქმეთა მინისტრი გიორგი გახარია საქართველოს პარლამენტში ხვალ მივა.