2 ახალგაზრდა მამაკაცია მოკლული, 2 კი დაჭრილი თბილისში, წავკისში მომხდარი შეიარაღებული დაპირისპირების შედეგად. შემთხვევა წუხელ, გვიან ღამით მოხდა.

მოკლულები ბიძაშვილები - 26 წლის ლექსო და 28 წლის დავით ფეიქრიშვილები არიან. ერთ-ერთი მათგანი შემთხვევის ადგილზევე დაიღუპა, მეორე კი, საავადმყოფოში მიყვანამდე გარდაიცვალა.

ერთ-ერთ დაჭრილს სამედიცინო დაწესებულებაში ოპერაცია ჩაუტარდა. ექიმები ამბობენ, რომ მის სიცოცხლეს საფრთხე არ ემუქრება. რაც შეეხება მეორე დაშავებულს, მისი ადგილსამყოფელი ამ დროისთვის უცნობია.

შემთხვევის ადგილზე მთელი ღამის განმავლობაში მუშაობდნენ სამართალდამცავები. უცნობია დანაშაულის მოტივი. შინაგან საქმეთა სამინისტროს მომხდართან დაკავშირებით ამ დრომდე ოფიციალური ინფორმაცია არ გაუვრცელებია.