შობის წინა დღეს, ვატიკანში წირვაზე რომის პაპმა ფრანცისკემ დაგმო კონსუმერიზმი და დაჟინებით მოუწოდა ადამიანებს ეძებონ უფრო მარტივი, ნაკლებად მატერიალისტური ცხოვრება.

წმინდა პეტრეს ბაზილიკაში პაპის რანგში თავის მე-6 საშობაო მსახურებისას, რომელსაც დაახლოებით 10 000 ადამიანი ესწრებოდა, 82 წლის პაპმა თქვა, რომ იესომ, რომელიც სიღარიბეში და ბაგაში იშვა, ყველა და განსაკუთრებით ისინი, ვინც „ხარბი და გაუმაძღარი“ გახდა, უნდა დააფიქროს ცხოვრების ნამდვილ მნიშვნელობაზე.

„... მოდი ვკითხოთ საკუთარ თავებს: ნამდვილად მჭირდება ყველა ეს მატერიალური საგნები და გართულებული რეცეპტები ცხოვრებისთვის? შემიძლია თავი გავართვა ცხოვრებას ყველა ამ არასაჭირო დამატებითი საგნების გარეშე და ვიცხოვრო უფრო მარტივი და უბრალო ცხოვრებით?“, განაცხადა პაპმა და დაამატა:

„დღევანდელ ცხოვრებაში, ბევრი ადამიანისთვის, ცხოვრების არსი ქონაში, მატერიალური საგნების გადამეტებულ ქონაშია ასახული. გაუმაძღარი სიხარბე კაცობრიობის ისტორიას მუდმივად თან ახლავს, და ის მეფობს დღესაც, როცა, რაგინდ პარადოქსულიც არ უნდა იყოს, ცოტა თუ სადილობს მდიდრულად, მაშინ როცა ძალიან ბევრი ყოველდღიური ლუკმა-პურისთვის იბრძვის, რომ გადარჩეს“.

რომის პაპი ფრანცისკე ღარიბების ქომაგობით გამოირჩევა. შაბათს, ვატიკანმა განაცხადა, რომ პაპმა რომის უსახლკაროებს წმინდა პეტრეს მოედანზე საჩუქრად ახალი კლინიკა გადასცა, სადაც მათ უფასო სამედიცინო მომსახურების მიღება შეეძლებათ.

„ევრონიუსის“ ცნობით, ვარაუდობენ, რომ რომში 16 000-ზე მეტი უსახლკარო ადამიანი ცხოვრობს.

ქრისტეშობის დღეს პაპი მრევლს წმინდა პეტრეს ბაზილიკის მთავარი აივნიდან მიმართავს, რაც წელწადში ორჯერ ხდება - შობას და აღდგომას.

შობას რომსა და ვატიკანში უსაფრთხოების განსაკუთრებული ზომებია მიღებული.

გასულ კვირას იტალიელმა სამართალდამცველებმა „ისლამური სახელმწიფოს“ წევრობაში ეჭვმიტანილი სომალელი მამაკაცი დააკავეს, რომელსაც იტალიაში ეკლესიების აფეთქების გეგმა გააჩნდა.