ეკონომიკისა და მდგრადი განვითარების მინისტრმა გიორგი ქობულიამ, რომელიც პარლამენტის დარგობრივ კომიტეტში დეპუტატების შეკითხვებს პასუხობს, მისი ერთ-ერთი სატელევიზიო კომენტარის შესახებ განმარტება გააკეთა და აღნიშნა, რომ „ადამიანებს ძალიან უჭირთ“ და „ჩვენ გვჭირდება ბევრად უფრო დიდი ტემპები იმისათვის, რომ ხალხს დავეხმაროთ და სიღარიბიდან ამოვიყვანოთ“.

ადამიანებს ძალიან უჭირთ და უჭირთ ისე, როგორც უჭირდათ გუშინ და გუშინწინ, აი, ამას ვგულისხმობ მე და ეს გასაჭირი მათი, იმდენად მძიმეა, რომ ის გასაჭირი რომ არ უარესდება, ეს არ გვეხმარება ჩვენ არაფერში და ამ ხალხს უნდა დავეხმაროთ. აი, ეს ვიგულისხმე მე. მაგრამ იმის თქმა, რომ ხალხს უფრო და უფრო, უფრო და უფრო, უფრო და უფრო და უფრო უჭირს, ეს არ არის მართალი. ჩვენ გვჭირდება ბევრად უფრო დიდი ტემპები იმისა, რომ ხალხს დავეხმაროთ და სიღარიბიდან ამოვიყვანოთ“, განაცხადა გიორგი ქობულიამ ჟურნალისტებთან საუბრისას.

რამდენიმე დღის წინ საქართველოს ეკონომიკისა და მდგრადი განვითარების მინისტრმა განაცხადა, რომ „ზოგს ჰგონია, რომ უარესად ცხოვრობს“, მაგრამ მისი შეფასებით, ფაქტები სხვა რამეზე მეტყველებს.

„შეიძლება განცდა აქვს ხალხს, რომ, რა თქმა უნდა, უჭირთ და ამიტომ ზოგს ჰგონია, რომ უარესად ცხოვრობს, მაგრამ რომ ნახოთ ფაქტები, ეს ასე არ არის“, განაცხადა გიორგი ქობულიამ ხუთშაბათს, „TV პირველის“ ეთერში.